تقدمت روعة وچلسات فلبلاصة لي دارتليها اسية حداها وفجنبها لاخور چلست تاليا . كان الجو غريب بيناتهوم , والسبب انهم مكايعرفوش بعضياتهوم هوما مجرد غرباء جمعهم القدر فمكان واحد. بينما كانو البنات كايشوفو فالنجوم بصمت غوت ياسين بالفرحة
ـ مـــــــراد غلبتــــــاك ...
ناضو أسية وتاليا كاينقزو بالفرحة وضارو على ياسين كايشوفو فداك الحوتة لي صيدها , كان عندها شكل غريب خصك تكون بحار الى بغيتي تشوف هاد النوع ديال الحوت . شكلها زوين ولكن بمجرد لمسها كاتنفخ وكاتولي كيف البالونة ...
قلب مراد عينيه بملل وزير على سنارتو على الله حتى هو يفرحهوم بشي حوتة حسن من ديال ياسين علاش لا .
لاحظت روعة إنزعاج مراد فإبتسمت وناضت قربت منو , ترددات فالأول لكنها زعمت و كلسات حداه على حافة اليخت وقالت بإبتسامة:
-انا متشوقة نشوف الحوتة لي غادي تصيد ...
شاف فيها مراد بدون تعابير على وجهو وقال:
-مع الأسف مكانظنش غاتشوفيها ...
ثم كمل وهو كايحاول مايضحكش:
-واش عمرك شفتي شي حد كايصيد الحوت بالمسكة
ماقدرتش روعة يعني دارت لي فجهدها باش ماضحكش ولكن غلبتها فلخر وطلقتها بصوت عالي وشاركها مراد الضحك وهو كايحرك راسو وكأنه كايقول "لا حول ولا قوة إلا بالله "
- هاهاهاها....
توقفات شويا من الضحك وقالت:
ـ يعني الصنارة ديالك ملسق فيها مسكة !!!....
وكملات وهي كاتقهقه بسخرية :
ـ هاهاها...ماقادراش نصدق !!
إبتسم مراد وهو كايسمع ضحكاتها ثم شاف فيها بهدوء وقال:
ـ لا غير صدقي ... هاد المسكة ملي صبح الله وأسية كاتمدغ فيها بحال شي آلة المانية ، حنكها ماعياش هدا لاش حيدتهالها ودرتها فصنارتي على الله نقدر نغري بيها شي حوتا ....
ضحكت روعة وهي كاتشوف فمياه البحر ثم قالت بعفوية:
-غادي تغريها فحالت الى كانت هاد الحوتة بنت , حيت البنات هوما لي عزازين عليهوم المسكة كثر من الرجال
شاف فيها مراد وإبتسم إبتسامة جانبية رجولية وقال :
ـ الى كانت بنت حقيقية فهي ماغادي تغريها لا مسكة ولا تقشيرة .. البنات ماشي من الساهل تضحك عليهوم من غير الى كانت شي حوتة دمدومة .
تلاشات ابتسامة روعة تدريجيا وحست بالالم فقلبها .. شعرت بمدى سخافتها ،... بعد المرات خصها تعرف شنو كاتخرج على فمها.... دمدومة!! , اه هدا هو التعبير الصحيح لوحدا حاملة فكرشها ولد لحرام كيف كايسميوه فالمجتمع ديالها , وابن حرام كيف كايسميوه فكاع المجتمعات فالعالم .
ابن الزنة , هداك الطفل البريئ لي كان نتيجة الحب الي تخلى عليه العاشق فرحم المعشوقة ، وخلاها فمنتصف الوعد وخلاها وحيدة على رصيف المعاناة.
ابن الزنة ، هو الوعد الي قطعو نصف رجل و صدقاتو أنثى ناقصة عقل و مراهقة , هو ثمرة نزوة أخطأت الحساب ؛ هو ضحية علاقة تنازلت فيها البنت عن شرفها لمن غلف لها المكر بالأمل ، فصدقاتو بغباء ونعسات في حضن شخص عند بالها مغاديش يخون وعدها وانه لو اضطر غادي يرفع الجبال على ودها.
سلمات راسها لرجل رفض يرفع سماعة تلفونو بعدما تحسس نبضات قلب ولد لحرام فكرشها ، خلاها في منتصف الطريق وجرا وبمعنى آخر لهث كيف الكلب مور وحداخرا عرات ليه على فخاضها.
ناضت روعة وهزات معاها خيباتها وكرامتها لي تكرفص عليها مراد واخا بدون قصد ولكن هو فعلا جرحها وخلا اثر جرحو فقلبها كبير ,... تسللت دمعة من بين جفونها لكن مالحقتش توصل لمنتصف خدها ومسحتها بسرعة وجلسات فالقنت وهي كاتحس بالضلم والذل.
تذكرات اليوم لي تعطلات عليها العادة الشهرية بأسبوع وكانت شاكة أنها غاتكون حاملة ، لذالك عملات تحليلة ديال البول وطلعات فعلا شكوكها فمحلها ، وأنها فعلا حاملة ، شبعات بكا ونواح فاللحظة لي وصلات الخبر لحبيبها "جهاد" وقابلها نكران.
ماعمرها تنسى أي كلمة خرجت من لسانو فاش قالها:
ـ أنا مازال صغير على الزواج وحنا بزوج بينا مازالين كانقراو كيفاش بغيتينا نتزوجو كيفاش بغيتي نتحمل مسؤولية طفل وأنا مازال كانقرا ومازال الواليد كايصرف عليا ... كاين حل واحد هو أنك طيحيه ، وأنا كانواعدك فاش غادي نشد الدكتراه ونلقا خدمة غادي نجي نخطبك من داركوم .
كان جوابها:
ـ واش عرفتي أش كاتقول؟! واش بغيتيني نقتل روح ربي زرعها وسط مني!؟ ، هدا راه ولدك أجهــاد
رد عليها ببرود:
- اللهم تقتليه هو ولا يقتلوك خوتك ، انا غير قلتليك لي كاين ونتي تعرفي .
كانت كاتحس مع كل كلمة كاتخرج من فمو بحال سيوفا كايغرزو قلبها المكلوم والمقهور ...تغرغرو عيونها بدموع وقالت بضعف:
-وإلا مابغيتش نقتلو ؟
تنهد جهاد وقال بعد صمت وهو كايحاول مايشوفليهاش فعينيها:
-قتلي راسك قبل مايقتلوك عائلتك .
ضربت هاد الجملة فراسها بحال الرعد ، اشنو غادي دير دابا كيفاش غادي تواجه هاد الدنيا والعائلة والمجتمع وفأحشائها نتيجة سداجتها وغلطتها بل غلطتهوم بجوج حيت ماعمر العافية ماتشعل بلا حطب أو أي وسيلة قابلة للإشتعال.
هي بغاتو بكل أحاسيسها ، هي عتابراتو نفسها وسلماتلو مفاتيح قبها .
ياك هو نفسها !،وعلاش غاتخاف على راسها معاه ؟.
هوما راهوم كبار راه ماشي صغار 23 عام هي قادرا تكون أم ، هي قادرة تكون عائلة ، إذن شنو لي غادي يمنعها تسلمو نفسها !.
ياك هو حب حياتها ، هو لي واعدها بزواج ، هو لي كان كايقوليها نتي ملكي ، نتي مي وختي ، نتي مرتي وام ولادي .
أشنو لي تغير دابا؟!
أشنو لي تغير فقلبو؟
علاش قابلها بالنكران وعاملها بإستهتار؟
لاء وعطاها نصيحة ماتخطرش على بال إبليس !، بغاها تقتل ثمرة حبهم ! او تقتل نفسها
تقتل ثمرة غلطتهم
ثمرة مكره
ثمرة غبائها.
اشنو غادي دير مع خوتها لكبار ؟....كيفاش غاتوضح لباباها أنها جابتليه العار .
واش غادي يتقبل أولا غادي يقتلها !؟
ولا فأحسن الحالات غادي يجري عليها ويطردها برا الدار باش تواجه وحشية الشارع....! باش تعرف بقيمة دفئ عائلتها لي ماعرفتش تحافض عليها .
باش تعرف قيمة حظن أمها الدافئ ، باش تستوعب أنها إرتكبت خطئ شنيع مستحيل يتقبلوه عائلتها ببساطة. وهذا مايرضي لا الله ولا العبد ... وهاد الجنين لي فكرشها مستحيل يشفع ليها ولو طلعت الشمس من المغرب.
شريكها فالخطئ نكرها ، و هي أصبحت بين نارين ، يا إما تقتل الطفل لي فأحشائها وتعيش حياتها كلها فتأنيب الضمير .
ولا تسمع لنصيحة جهاد و تقتل راسها وترتاح وتريح عائلتها من العار ، رغم أن لي غاتلقاه فالسماء السابعة مجرد جحيم كايتسناها وفاتح ليها دراعو ، إلا أنه بالنسباليها فديك اللحظة وهي كاتسمع كلمات "جهاد" القاتلة كان الجحيم أهون ليها بمليون مرة ، من كلامو و من نظرت المجتمع القاسية ليها.
خرجت من دارها ليلة الأحد مور لفجر غير بشوية بعدما صلات وطلبت من الله يغفر ليها هادشي لي غادي دير ، هزات لماماها 5000 درهم لي كانو مخبعينها لعرس خوها المتوسط ودارتهوم فجيبها وخرجات ، كانت مقررة تنتحر بطريقة غريبة شوية وفريدة من نوعها.
و صلات للشاطئ وكان فإنتظارها الشخص لي غادي تسلمو لفلوس ، عطاتهالو وطلعها على مثن الزورق لي كان محمل ببزاف ديال البشر أغلبهم أفارقة حلمهم يقطعو لبحر لنعيم أروبا ، بينما هي كانت واضعة حياتها على شفرة حادة.
تفكرات اشنو قالت وهي واضعة راسها على سجادة الصلاة وكاتبكي:
ـ يارب أنا غلطت سمحلي كانترجاك ، يارب السموات و الأرض ليس لي سواك ، ياذا العزة والجبروت ، يابارئ الملك والملكوت ، يامن أمنت يونس في بطن الحوت ونجيت موسى في التابوت ، ونجيت الحبيب محمد بنسيج العنكبوت ، سبحانك انت الحي الذي لا يموت ، اللهم إني أستخيرك بعلمك وأستقدرك بقدرتك ، وأسألك من فضلك العظيم ، فإنك تقدر ولا أقدر ، وتعلم ولا أعلم ، وأنت علام الغيوب ، يارب أتيتك اليوم أستخيرك بالغلام اذي رزقتني إياه ووضعته في أحشائي ، فإن كان لي فيه خيرا في ديني ومعاشي وعاقبة أمري فاقدره لي ويسره لي ثم بارك لي فيه ، وإن كنت تعلم أن هذا الطفل شرا لي ومعاشة أمري فيارب إقبض روحي وخدني إليك ، سأضع نفسي بين يديك ، وأنا أعلم أن رحمتك تغلب بلائك ، فيا رب خدني إليك ، وسامحني على خطئي وسداجتي وسامحني على عهري وحقارتي ، سأضع روحي بين يديك إفعل بي ما تشاء ، خدني إليك أو إفتح لي أبواب حياة جديدة في جنتك أو في دنياك مع طفلي يا ربي إني أخشاك سامحني .
طلعات على متن الزورق المكتض بالناس ولبسات سترة النجاة وهي في كل الإستعداد باش تلاقي مصيرها و كلها أمل أن ربي غادي يسامحها في أخر المطاف ، إما تموت وتدي سرها معاها أو تنتقل لعالم جديد وبلد جديد وحياة جديدة مع ولدها ولا بنتها فحياة بدون تحقير ليهوم بجوج.
بغات تنتقل معاه لمكان لي ماغاينعتوهاش فيه الناس بأصابع الإتهام ولا غادي يستحقرو طفلها وينعتوه بولد لحرام
بغات عالم جديد وناس جداد مكايعرفها فيه حتى واحد باش تعاود تكون حياتها من جديد بعيدا على المشاكل بعيدا عن جلب العار لعائلتها ،و لو كان إختفائها غادي يخلي صورتها عند خوتها وواليديها زوينا فهي ماعندهاش مشكل تموت وسط لبحر المهم تبقى دكرى زوينة عند الناس لي لطالما حبتهم من كل قلبها وتمنات شي نهار تشرفهم وتفرحهم لكن مع الأسف وقاع لي وقاع وفبلاصت الفرحة هي جابت ليهوم العار لي بسببو غادي يكرهوها طول حياتهوم.
رجعات للواقع وشافت فلبنات لي كانو ضايرين على ديك الحوتا بفضول بحال شي جوج بنيتات فعمر الخامسة وإبتسمت بحزن وهي كاتحسس بطنها وانتقلت بعينيها لنجوم السماء وهمست:
ـ شكرا يا الله ، شكرا لأن رحمتك غلبت جبروتك ، شكرا بعدد نجوم سماك شكرا بعدد قطرات بحرك ، شكرا لأنك مابغيتينيش نموت .
كان جبل جالس فوق سطح غرفة القيادة أمامها بالضبط بلا ماتلاحظو وكايسمع لتيمنها للخالق سبحانه وتعالة ، وإبتسم بهدوء وهو كايدقق فكل تفاصيلها ، شعرها الأسود الطويل لي كايوصل لتحت مؤخرتها ، للحظة تهيألو وكأنه كايشوف فالشخصية الكارتونية "ربانزل" هاديك الأميرة لي خطفاتها ساحرة فاش كانت صغيرة وخبعاتها فبرج طويل ومنعاتها تقطع شعرها حتى وصل لطول البرج ، ولا شفايفها لوردين ولا بشرتها القمحية ولا عيونها العسلية شداتو ليها بكل تفاصيلها ، ولأول مرة فرح بإنجازو لشي حاجة فحياتو بإنقادها .
شاف فالأخت ديالو تاليا هاديك البنت الصغيرة المدللة لي كبرات فكنف عائلة غنية لدرجة التخمة ، ماعمر شي حد خصر ليها خاطرها لي تمانتو كانت كاتلقاه حتى قامت الحرب فسوريا وتدمر كولشئ .
حياتها وحياتو وعائلتو ومملكة باباه هداك الوزير الدفاع الغني ، هداك الشخصية المخملية لي تقتل وسط الحرب هو وكل عائلتو البورجوازية ، وبقا منها بحرا جبل وتاليا .
حمد لله جبل أن ختو ماعاشتش داكشي لي عاشو هو وعائلتو ... الأب ديالو فاش شعر بالخطر سيفط أخر العنقود لعائلة الام ديالها لي فالمغرب حتى لحق عليها جبل من بعد الكارثة وهو مدمر نفسيا .
أصبحت حياتو منقسمة لثلاث أقسام بين اسبانيا وجزيرة إبيزا وبين المغرب ، كان فينما كيسمحلو الوقت كايقطع لبحر لمملكة الأب ديالو " محمد إبراهيم مرتجى" فإبيزا ويقضى شغالو ويرجع للمغرب لعند خوالاتو لي كانو كايحسسوه بدفئ العائلة .
لكن هاد المرة هو كان حريص أنه يعبر البحر مع البضاعة ديالو بدون علم سي مرزوق لي كان عند بالو أن لحشيش غادي يسلمو لمولاه "البارون" فإسبانيا.. مافبالوش أن البارون" راكب معاه فنفس القارب وهاز ليها لهم أكثر منو هو شخصيا .
اكيد رجال الوالد ديالو وخالو " دون ماركيز" غادي يكون تسناوه بلا قياص فجزيرة "إيبيزا" وأكيد هوما تأكدو أنه واقعاليه شي حاجة ، يعني أكيد غادي يدخلو ويديرو لي فجهدهوم باش يلقاوه وسط هاد التوت الخالي .
على الأقل هادشي لي كان كايتمناه فخاطرو ، تمنى أن رجالو حتى هوما مايتخلاوش عليه كيف تخلات عليه بلادو وعائلتو ، تمنى من كل قلبو أن طرف دلخبز لي كلاوه مع السيد " محمد إبراهيم مرتجى " مايكونش مشى فمجاري الصرف الصحي ويكون مازال كايجريلهوم فالدم.
شاف فختو مزيان وتفكر شحال ديل تساؤلات طرحات عليه قبل مايطلعو على متن يخت الجوهرة , علاش ماسافروش فطيارة ولا لباطو ياك هوما عندهوم أوراقهوم القانونية ؟ وعلاش هوما مسافرين بهاد الطريقة وكأنهم هاربين من شي حاجة ؟ لكنه قدر يقنعها بطريقته الخاصة بدون مايجاوب على أي سؤال من سؤلاتها الفضولية .
رجع شاف فيها وتمنى أنها ماتعرفش بلي كايجرى خلفها ، تمنى لو أنها بقات طفلة ماكبراتش باش ماتعرفش أن باباها هو فالحقيقة نهب نصف أموال الشعب السوري فاش كان وزير ، وبنا بيها إمبراطورية خاصة بيه فجزيرة "إبيزة" وماكفاهش الأمر بل زاد الطين بلة وبدا كايتاجر فالممنوعات وشد فلوس كتيرة كتصبيق لأطنان ديال المخدرات ومات وخلى ولدو هو لي يتكلف بإيصال البضائع لأصحابها ، كان جبل مضطر باش يوفي بالدين ديال باباه لي ورطو فيه قبل مايقتلوه .
جبل كان كايخطط لشي حوايج ممكن يأديو بحياتو وحياة لي كايبغيهوم للهلاك فالمستقبل لكنه ماغاديش يستسلم حتى يحقق غايتو ويوصل للحلم ديالو لي كان كايحلم بيه ملي كان صغير .. حلمو فداك الوقت مكانش قدو ...لكن دابا .... جاء وقت الحساب والعقاب ...
على جبل راسو وشاف فالنجوم السماء لي كانت صافية وكأنه عمر شي عاصفة دازت منها وهمس بصوتو الغليض :
- ما رح خلي حجر فوق حجر يا "شاهين باشا" لحتى سيل دمك
___________
بتاسمت تاليا وهي كاتقول بطفولية :
ـ ياسبحان الله , شوفو شكلها قديشو حلو ...
ردت عليها اسية وهي كاتلحس شفايفها بجوع:
-وحتى مداقها غايكون زوين
شافو فيها ياسين ومراد ونفاجرو بالضحك ماعادا روعة لي مالقات كيف دوزلها هاد الضحكة فإبتسمت إبتسامة باهتة بلا روح .
-تشهيت هاد الحوتا غير فشي مقلا ديال البايلا بروز , كانحس بحليمات لساني فيهوم مداقها قبل حتى ماندوقها ...
قالها ياسين وهو كايتلدد عليها فردات عليه تاليا بإستياء
-عيب عليك يا ياسين ما شفتها كيف انتفخت بالخوف من كلامك ....
تعالت اصوات ضحكاتهم الساخرة من شي لي قالتو تاليا وقال مراد :
ـ تنفخات بالخوف , هاهاها تعبير فشي شكل
عقدت تاليا حواجبها بغضب طفولي وقالت:
ـ عم تتريقو عليّ هلاء , والله ما عم كزب هانوع من الأسماك لما بيخاف بينفخ حالو فبيصير مثل البلونة
جاوبتها اسية بسخرية وهي كاتشوف فالحوتة لي كانت كاتعوم فوسط السطل ديال الماء كبير :
ـ الجوع كافر ياختشي مكايخليش فالقلب الرحمة باش نفكرو واش الحوتا خايفا ولا لا ...وخا تكون حورية بحر بقدر جمالها غادي ناكلها لموهيم نشبع كرشي ونسكتها من لغوات ...
ثم وقات بحماس وكملات وهي كاتقول وكاتصفق بيديها:
ـ شكون لي كايعرف يطيب الحوت يبالي بيها... انا بعدا من هاد المنبر كانقوليكوم أنني ماغانصوبهاش ولكن كانواعدكم أنني غاناكل منها.
شافو فيها كاملين باستخفاف ورد عليها مراد وقال :
ـ هدا كايعني انك نتي لي غادي تصوبيها
-شناهوااا .. هاء غير حلم
-والله حتى تصوبيها نتي
-والله وصبوتها أنا يماتاكلها نتا
-غادي ناكلها بسيف عليك
-الا كليتي منها غادي نطيرليك سنانك مع لسانك ونلوحهوم فلبحر
بداو فلغوات ولمخاطرا نتا لي غاتصوبها لا نتي لي غاتصوبيها ، اواحد كايلصقها فتاني اواحد كايواعد الاخور انه الا صوبها ماغاديش يخلي حتى واحد ياكل منها وكأنهم صيدو بقرة ماشي سمكة كايبلغ وزنها 500 غرام ماغاتكفي تسد جوع حتى لشخص واحد حراك 7 ديال الناس.
- حتى شي واحد فيكوم ماغايطيبها , لوحوعليكوم داك زبل
لتافتو كاملين لداك الصوت المستفز لي جا من خلفهوم وكان هو مرزوق واقف بقامتو الطويلة وبشعرو الشايب وبقايا ملامحو الوسيمة الشبابية خلف تجاعيد وجهو وكايشوف فيهوم ...
ابتسم مراد بسخرية وقال وهو متمسك بصنارتو كايشوف فلبحر امامو:
ـ واخيرا عمو التونسي خرج من غارو ... غنيو معايا كولكوم .. وبارشا بارشا يامدلل .....
وكملو موراه ياسين وتاليا واسية وهوما كايصفقو بيديهوم
ـ بارشا بارشا
-حبك على قلبي تسلل
ـ بارشا برشا
ـ ماعارفش لكمالا ديالها ...
قالها مراد ونفاجرو كاملين بالضحك من حد حتى روعة وجبل لي كان فوق سطح اليخت غلباتو الضحكة وهو كايشوف فوجه سي مرزوق لي تلون وبدا يصفار ويخضار من شدة الغضب.
ضار مراد و شاف فمرزوق وقال بتهكم:
ـ عاود شنو قلتي اشيباني , كيفاش نلوحوها , حوتا وحدا بستا وستين كشيفا باش صيدناها ونتا كاتقول لينا نلوحوها
قرب سي مرزوق من السطل وطل عليه من لفوق بفضول وقال بجمود :
-ـ سمكه البالون.... كايتعتابر هاد النوع من السمك قاتل للبشر , حيت فداخلها كاين واحد المادة سميتها تيترودوكسين , فهاد المادة اشد سمية ب 1200 مرة من السيانيد القاتل طبعا ماغاديش تعرفو شنو كايعني هاد السيانيد حيت نتوما واحد لمجموعة ديال لمكلخين و الاغبياء تجمعتو على يختي واستوليتو عليه كيف لقرودا
قلب جبل عينيه وهو كايراقبو من الفوق ، الى كان شي واحد كايعرف حقيقتو فهو جبل بحد داتو فبلا مايبدا يمثل عليهوم دور العريف المتحذلق ، لي احقى باغي مصلحة الفريق.
وقف ياسين و قال بغيظ :
ـ لي يسمعك كاتهظر يقول راحنا خاطفينك ، أولا حنا كاملين طلعنا على هاد اليخت بالرغبة ديالك أضف إلى معلوماتك عطيناك رزقنا فالمقابل جوج ديال المليون للواحد ، يعني مايمشيش بالك بعيد ويحسابك راك داير فينا خير أعمو.
توترات روعة فاش شاف فيها سي مرزوق وكأنه كايعني بنظراتو راه كاين لي ماعطاش حتى السانتيم وهاهي تتربع فوق عرش يختي الحبيب ، لكن أسية ماخلاتو يقول حتى كلمة بخصوص روعة فاش شافت نظراتو الحاقدة ليها وقالت:
ـ أنا بغيت غير نفهم اسي مرزوق ، علاش نتا حاقد علينا هاكا وكأننا حنا لي تسببنا فهاد العاصفة!؟ ، الى جينا نتحاسبو راه نتا القبطان ديال هاد اليخت ، والتأكد من سلامت المعدات كانت مهمتك ماشي مهمتنا! ، يعني إلى كنا حنا واحلين هنا فأنت لي كاتحمل المسؤولية ، وحنا لي من المفروض نكونو فحالة غضب وسخط ماشي نتا ، حنا لي خصنا نحشيولك الهضرة فطالعة وفنازلة ، حتى مسدس الإغاثة كيف الناس ماعندكش ، وكاتحسبو هذا يخت ، راه الى لحتى خشبة ولا قزديرا فوسط الماء غادي طلع فوق سطح الماء والى كونتي كاتحسب انك ملكتي الدنيا بهاد اليخت فاسمحلي نقولك هاد اليخت مجرد قطعة خردة مابقاتش صالحة لحتى حاجة ، كانصحك تسوسها عليك غير نخرجو من هنا على خير..
إستدار سي مرزوق بغيض وتمشى لراس اليخت ووقف ثم قال وهو كايشوف فالسماء:
ـ ياه ياه ياه ، تحاميتو عليا اتريكة لمفلسا ... إيوا خليوني نكمل ليكوم بعدا , اسيادي سمكة وحدا من هاد النوع فيها سم يكفي باش يقتل 30 انسان بالغ , شفتو شحال انا انسان طيب .....
لتافت لعندهوم وكمل بتحادق...
ـ لوكان يحسابلي ردت فعلكم غاتكون هاكا , على الأقل كنت نخليكوم تاكلوه ونتهنا منكوم فخطرا ماكنت غانخسر عليكوم والو ، سوى دفيعا برجلي لعرض لبحر ، و الخاسر لكبير هوما نتوما .....
ثم دخل لكابينة القيادة وزدح موراه الباب بقوة وغضب حتى تهز اليخت على إثر الزدحة
تنهد ياسين بغضب وبقا كايشوف فديك الحوتة ثم قرب منها وهز سطل لي كانت فيه وقلبو فلبحر ، أطلق سراح السمكة و مشات بحالها لكن فقتاش غادي يتطلق سراحهوم حتى هوما ؟
____________
نهاية الفصل