فالدار عند روعة كانت چالسة على أرضية المطبخ وضامة رجليها لحظنها وحاطة راسها فوق ركابيها وهي كادلك معصمها لي تحول للون الأحمر متقرح ... تنهدت بألم ثم همست بصوت مجروح .
- ياربي ماتعاقبنيش بسبب ذنوبي القديمة ... ماتعاقبنيش بحاجة ختاريتها وكنت إستخرتك بها وتعذبني بيها باش يكون درس ليا اني نتعامل مع أسوء أنواع البشر ، ياربي كانترجاك ماتعاقبنيش بذنوبي وغفرلي وإرحمني .
مررت أناملها بين خصلات شعرها بعدما شعرت بالألم كايهرس فراسها فناظت من على الأرض وتوجهت لغرفتها وهي كاتشد فلحيوط باش توصل لغرفتها ولكن فاش دخلات تصدمات فشادو لي كان ناعس فوق السرير ورايح فسابع نومة وكأنه مكاينش فهاد العالم ...
المنظر ديالو خلاها بسيف عليها ضحك واخا أنه لا الوقت ولا الخاطر يخليها ضحك لكن شادو أتحفها بأعضم إنجازاتو التاريخية ، فتمتمت وهي كاتسحب الغطاء من تحت منو حتى طاح للأرض ....
-نوض تگعد
حل شادو عينيه وبدا كايشوف فالسقف بنظرات واحد مصدوم ومازال كايحاول يستوعب أنه قبل ثواني كان على السرير ودابا مرمي فالأرض !!!! .
مابقاتش الثقة فهاد الدنيا لي تحسبهوم حبابك فلحظة يرميوك فالأرض ..هادشي لي كان كايفكر فيه شادو قبل ماينوض ويشوف فيها بنظرات الإستياء ثم ضرب الباب وخرج وخلاها كاتشوف فظلو ...
- عولنا عليك بكري ، سيزي ارجل منك اعرت الرجال ... لو كان شي شفار لي هجم على الدار وقتلني هاه ... أنا شاكة انك كنتي غادي تاكل الجثة ديالي من بعد ... ياودي على كلاب أخر الزمن.
تمتمت بيها روعة و تحشات ففراشها وهي مقررة تنعس رغم أنها ماواكلاش وعاد ضربت حقنة الأنسولين لكن النعاس هو افضل وسيلة للهروب من المشاكل والواقع والهموم بالنسبة ليها
__________
كان جبل واقف فالحي لي ساكنة فيه روعة ومتكي على سيارة بيضاء ومعلي راسو كايشوف فالطابق لي ساكنة فيه روعة لكن فاش شاف الضوء الوحيد لي كان فالطابق تطفى تنهد بضيق وحنى راسو وهو كايقول :
- اللعنة عليك اداوود ، بسببك ضاعت خطتي
وقفت عند رجليه سيارة جيب سوداء كبيرة ، طل منها رافاييل وقال بصوت ساخر وهو كايغمز بعينيه وكأنه كايهضر مع شي بنت.:
- سلام الغزالة فين غاديا نوصلك فطريقي.؟
علىّ جبل عينيه وشاف فيه بغضب وقال بصوت بحال الرعد:
-للجحيم ... توصلني ليه ؟
تراجعت إبتسامة رافاييل الساخرة وتنحنح وهو كايقول :
-اوووه ...انا غادي نقلب فين نتعشا طلع نوصلك فطريقي للجحيم .
شاف فيه جبل بنظرة غيظ كايعني بها أن مزاجو ماشي ديال الضحك هاد نهار فكمل رافاييل وهو كايقول بسخرية:
- ابتسامة جميلة يا قوم العابسين ... لهاد الدرجة معصب حيت تعطلت عليك ؟
قلب جبل عينيه بغيظ ولتافت حول السيارة وهو كايسب فيه وركب فالمقعد المجاور للسائق وقال بغيظ :
- اشنو سبب هاد المزاج ، شفتك فرحان ؟
ديمارا رافاييل المحرك وقال وهو كايقلع بسيارتو:
- سبقلي قلتليك أن عندي ختي بالتبني .. ايوا اسيدي هاد نهار ولدات بنيتا ، يالاه خرجت من عندها من طبيب فاش عيطتيلي باش نوصلك.
-مبروك عليها .
قالها جبل ببرود فرد عليه رافاييل بحماس:
- كون شفتيها شحال زوينة ويديداتها شحال صغار.
ماجاوبوش جبل بل ظل ساكت وهو كايشوف فالطريق أمامو فكمل رافاييل وهو كايقول:
- مالك اصاحبي معصب غرقوليك لبابر
رد عليه جبل بغيظ :
-مامساليش للضحك ديالك ارافاييل ؟
قلب رافاييل عينيه بملل وقال:
-والله حتى تقولي مالك واش وصلك شي تهديد من عند رجال شاهين باشا .
شاف فيه جبل وقال بصوت حازم:
-حاليا مازال
سكت شويا رافايل وقال :
-واش دون ماركيز فخبارو أنك دخلتي لجزيرة إبيزة قبل ستتة شهور ماشي هاد صبح؟
رد على جبل وهو كايمسح وجهو بيديه بتعب :
- حتى شي واحد مافخبارو من غيرك نتا و "هاري" وعصام
أومأ رافاييل براسو وقال:
-كنت كل نهار كاتقول اليوم غدا اليوم غدا يرجعولنا الضربة لكن ماطلعش حسهوم ، واخا ضيعنالهوم صفقة كاتسوى لملاين
ظهر شبح إبتسامة جانبة على ملامح جبل وقال بهدوء:
- مازال كايحاول يستوعب الإنقلاب ديالي عليه ، مازال ماتسرطاتلوش ...وكون هاني ضربتو ماغايفلتهاش غادي يخصك تكون حريص ومنتبه طول الوقت نتا ورجالك .
________
رجوع بالزمن
قبل ستة أشهر /الميناء القديم / إبيزا /الساعة الثالثة بعد منتصف الليل
قرب المستودع القديم والوحيد لي بقا صابر اواقف ضد رطوبة البحر بين المستودعات المجاورة فالميناء القديم . كانت جوج مافيات واقفين فعملية مقايضة بين تجارة البشر و الأسلحة لمجموعة وحداخرا بإسم البارون جبل .
كان جبل واقف بالهيبة ديالو المعتادة وهو لابس اللون الأسود من راسو لأخمص قدميه ... وفالجانب ديالو واقف رجل فالثلاثينيات ...ملامحو مبهمة خلف ظل قبعة سوداء لي كانت خافية نصف ملامحو ومكايظهر منو غير شفايفو الحادة ودقنو خشن مزين بلحية عطاتو منظر رجولي جداب ومخيف .
بينما زعيم العصابة الأخرى كان رجل كبير فالسن بجسد غليض وكرش سابقاه وشعر مزين بالشيب لي ودع سواد شبابو
رفع الزعيم الشاب انظارو بتكلف فاش قرب جبل باش يهز قطعة من السلاح وبدا كايتفحصها بعيونو الزمردية وعبس بوجهو بعدم رضى وكأنه كايشكك فمصداقية بضاعتو ، وهادشي لي ماحملوش الرئيس الشاب لكن بقا حاضيه بصمت .
خرج جبل من جيب معطفو سيجارة أمريكية فاخرة بعدما وضع السلاح فبلاصتو بينما عينيه الشرسة كاتراقب الزعيم الكبير لي أمر رجالو باش يجيبوليه وحدا من لبنات لي باغي يبيع...
تقدم رجل اسود ضخم البنية وهو جار موراه بنت شعرها أشقر و قصير وجسمها هزيل ومغطيه أثر لكدمات زرقاء بينما لابسة او ملبسينها ملابس فاضحة نصف عارية بحرا ساترالها العورة ديالها ...
تصنع جبل الإهتمام وهو كايتفحصها بعينيه الشرسة من راسها حتى لأخمص رجليها... إبتسم جبل إبتسامة صفراء وقال ...باللغة الإنجليزية
-عجبتني البضاعة ديالك الكولومبي واخا مضروبة ...
فرد عليه الرجل الكولمبوي الشايب بإبتسامة مقززة وقال وهو كايقرب منو:
- الكولومبي دائما فخدمة الشيطان السوري سليل البارون مرتجى ، وعندي ليك بزاف من هاد الزعرة فمختلف الجنسيات والأعراق ماعليك غير تختار وهادي خدمة مكانقدمهاش لكولشي من غير للناس المميزين لي كايعجبوني
ماجاوبوش جبل بل ميل راسو ودار إشارة براسو لرجالو لي كانو فالأصل من الإنتربول باش ياخدو البنت ويخرجو باقي لبنات لي فالمستودع لي كايبلغ العدد ديالهوم 60 بنت مربوطين شي مور شي بحال المساجين وماكدبش فاش قال الكلومبي أنه عندو بنات من مختلف الأعراق والألوان
إلتفت جبل شاف فـ "هاري" بنظرة مبهمة كاتعني "تراجع للخلف " ، ورجع شاف فالرجل الثلاثيني الغامض وقال بلهجة مستفزة:
-دايموند النيويوركي ، مع الأسف ماعجبتنيش الخردة ديالك .
توسعو عيون دايموند بصدمة قبل مايرفع جبل رجليه ودفع الصندوق لكبير بقوة حتى تقلب وتشتت السلاح على الأرض ، وهادشي ستافز دايموند لي غوت بغضب لكن ماقدوش الوقت باش يعبر على غضبو بالكلمات لأن جبل عطى إشارة بعينيه لرجال الإنتربول
وبطرفة عين تقادف الرصاص من كل صوب و بداو كايطيحو رجال العصابات واحد مور واحد مقتولين برشاشات الأنتربول لي نزلت عليهوم بحال الشتاء من سماء .
تصاب الرجل الكولومبي ومات بينما هرب دايموند النيويوركي بسرعة وحتمى خلف سيارة من سياراتو وهو مصدوم من شي لي واقع ... وكيفاش إنقلب الوضع لهاد الحالة وهوما مابيناتهومش حتى عداوة ؟!
قرب منو جبل بخطوات هادئة بعدما زطم على عقب السيجارة بمؤخرة صباطو الأسود وإبتسم بإبتسامة شيطانية جانبية هادئة ....فغوت دايموند بغضب عارم لدرجة برزو عروق حنجرتو بعدما فرغ مخزن سلاحو لكن فاش وقف عليه جبل وكأنه ملاك الموت غوت دايموند بغضب :
- علاش البارون تقلبتي ضدنا ... نتا غدار ولد ال** ، غادي دفع الثمن غالي على هادشي كانواعدك !
جاوبو جبل بمنتهى البساطة وبصوت بارد كيف الثلج :
- كايبانلي أنك فاهم موضوع المافيا غلط .. اسي نيويوركي حنا ماعمرنا كونا أوفياء لشي حد من قبل ، وهادشي كايرضعوهلنا فحليب امهاتنا فاش كانتولدو فوسط عائلة مافيوزية بحال سلالتنا ادايموند ...
إبتسم جبل بإبتسامة شيطانية كلها مكر وقال :
-واش حافض الشهادة ولا ترددها مورايا ؟؟..
ثم ضحك بصوت عالي وكمل :
- اوووه ... نسيت أنك ماشي مسلم .
خرج جبل من خلف ضهرو مسدس روسي مصنوع من الفضة اوجهو لعند رأس دايموند لكن قبل مايضغط على الزناد إنفجر رأس دايموند وتناثرة أشلائو على ملابس جبل لي قلب عينيه بغيظ وشاف فعصام وغوت :
-عصاااااااااااااااام !!!
رد عليه عصام ببرود وهو كايقرب منو:
-مابغيتكش توسخ فيه يدك معلييييييم .
برك جبل على أسنانو بغضب وغوت :
-أخرتك غادي تكون على يدي أعصام ... مالك على لخصايل مالك ؟
قلب عصام عينيه بعدم إهتمام وهو كايتمتم فقرب منهوم رافاييل وهو كايغوت بغضب فوجه عصام :
- علاش قتلتيه اصاحبييي ، كونت باغي نحقق معاه مازااااااال.
قلب عصام شفايفو بلامبالات وقال وهو كايرجع مسدسو لخلف ضهرو وكايمدغ المسكة بفمو :
-اووبس ... هادي غير رصاصة طايشة من مسدسات المافيانتربول بغيت نقول الإنتربول .
نفخ عصام المسكة بفمو وطرطقها ثم قلب الضورة و مشا لسيارتو وهو كايتمايل بجسمو الرياضي مخلي موراه رافاييل وجبل كايشوفو فيه بدهشة .
شاف رافاييل فجبل بغضب باش يتدخل ولا يلقن درس لعصام عمرو ينساه لكن جبل إبتسم بسخرية وقال:
-ماتديش عليه ... مازال شاد فخاطرو منك ... مابغاش يستوعب مازال اننا فجنب الإنتربول . ومازال ماتسرطاتلوش الضربة لي عطيتيه داكنهار .
رجع رافاييل مسدسو خلف ضهرو وزمجر بغضب :
- غادي يستوعب بسيف عليه .
توجه رافاييل لعند رجالو وأمرهوم باش يجمعو الأسلحة لي شتتهوم جبل فالأرض برجليه وأمر باش يوصلو البنات المخطوفات للمستشفى باش يعاينو صحتهوم الجسدية ويقدمولهوم الدعم النفسي بعد العداب لي عاناوه طول فترة إختطافهوم .
تمشى جبل للسيارة لي كان راكب فيها عصام ودق عليه فالجاج فنزل عصام زجاج سيارتو وشاف فيه بإستياء .
تنهد جبل وقال وهو كايشعل فسيجارة جديدة بين شفايفو :
- واش ختي لباس عليها ؟
ثم نفخ سحابة دخان ومد السيجارة لعصام لي شدها من عندو وسحب منها نفس جاوبو ببرود:
-لباس عليها معليم ماتخافش عليها ...، وحتى سي دون ماركيز بيخير ملهي مع الشركة ومشاكلها .
همهم جبل بتفهم وقال وهو كايستالم السيجارة من يد عصام :
- همم ...مزيان ..
سكت شوية وجاتو على بالو يسولو على روعة فين وصلات وشنو الجديد ديالها ، لكن تردد ومتانع عن سيرتها ثم قال.
- مابغيتش دون ماركيز يعرف أنني هنا فإبيزا تفاهمنا .
أومأ عصام براسو وقال:
-أمرك معليم ... ولكن فقتاش غادي ترجع ؟
رد عليه جبل بحيرة :
- ماعرفتش غادي نرجع لإسبانيا مؤقتا باش مايتكشفش أمري...و نتا رجع لڤيلا كونتيسا بشكل عادي وكأنك عمرك طلاقيتيني تفاهمنا .
- أمرك معليم .
قاطع حديثهوم تلفون عصام لي صونا فدارليه جبل إشارة براسو باش يجاوب وداكشي لي كان ... فتح عصام الخط وقال :
- نعام أروعة
شعر جبل بقلبو كايضرب بسرعة فاش سمع إسمها لكن فاش شاف إبتسامة عصام العريضة حس بشي حاجة ماشي هي هاديك فكمل عصام وهو كايقول :
-اش مازال مفيقك فهاد الوقت ؟؟؟... شنو بغيتي نجيبلك معايا فاش نكون جاي ؟؟ ...الحلوة!! واش نتي مازالة صغيرة .
قلب جبل عينيه بملل وكمل عصام وهو كايبتاسم:
- وشنو أخر .... السوسيس ... هاهاها غاتخلطي الحلوة مع سوسيس ... باغيا تباتي فالإنعاش اليوم ... صافي فصبح غادي نجي عندك مشا لحال دابا ... وجدي شي فطور مضخم ... يالاه تصبحي على خير الغزالة
قطع عصام الخط وشاف فجبل لي كان كايتصنع الا مبالات لكن فداخلو كان معصب .... تنهد و مال جبل بأنظارو لمكان بعيد فلمح جسم "هاري" من بعيد كايشوف فيه بعيونو الزرقاء المحيطية فهز جبل راسو بتثاقل وكأنه عطا إشارة لهاري باش يهرب ويرجع لمقر الكاريبي يوصل ليهوم خبر موت دايموند والكولومبي.
لاحظ عصام نظرات جبل لهاري لي كان فوق هضبة صغيرة متوجه لسيارتو فقال وهو كايتنهد بصوتو لغليض:
-معليييم ، إلا عرفو الكاريبي أن هاري جاسوس اللإنتربول غادي يقتلوه ، مستحيل يخليوه عايش !
شاف فيه جبل بنظرات مبهمة وإكتفى بالصمت فكمل عصام وهو كايقول بعتاب :
- هاري هو أحسن گارد عندنا ، علاش ضحيتي بيه ولحتيه عندهوم معليم ؟
شاف فيه جبل بحدة ثم قال:
- لو كنت طلبت منك نتا تكون الجاسوس ديالنا عند الكاريبي ، كنتي غادي تقبل ؟
حنى عصام راسو بتردد ثم قال:
-الكاريبي المعلم را....
قاطعو جبل وهو كايقول بصرامة :
- هاري هو لي ختار مصيرو ، انا ماجبرتو على حتى حاجة ، شاهين باشا كان السبب فموت باه وهو ماغاديش يضيع فرصة باش ينتاقم ليه .
توسعت عيون عصام بدهشة وقال:
- مكنتش عارف هادشي المعلم سمحلي !
بعد جبل على السيارة وضرب على إطارها بيديه ضربات طفيفه وهو كايقول :
- يالاه أعصام سير قبل مايبداو يقلبو عليك .
رد عليه عصام بطاعة :
-أمرك معليم
___________
العودة إلى الواقع
وسط المدينة / الساعة التاسعة وخمسة وأربعون دقيقة مساءً
توقفت سيارة الجيب ديال رافاييل أمام باب مطعم كبير أقل مايقال عنه فخم وفاخر ... تخطاو الباب وإستقبلهوم الگارسون لي وصلهوم لطاولة خاوية وإستلم منهم معاطفهم السوداء الثقيلة ...
طلب رافاييل نودلز كوري مع الحبار والماشروم والسمسم وللتحلية طلب تيراميسو فرنسي ....بينما إكتفى جبل بفنجان قهوة ساخن إيكسبريسو امريكية .
باشر رافاييل بالأكل بينما إرتشف جبل رشفة من القهوة ثم حطها بتقزز و شرب شوية ديال الماء ... شاف فيه رافاييل بإستفهام وقال:
-ماعجباتكش القهوة ؟
جاوبو جبل لا شعوريا:
- شربت قبيلة قهوة أحسن من هادي مليون مرا .
لكن فاش إنتبه لراسو أنه تكلم على القهوة لي وجداتليه روعة تنهد وهو كايحس بضميرو كايأنبو من جيهتها...
-فين شربتي هاد القهوة السحرية لي حسن من إكسبريسو بمليون مرة ؟
قالها رافاييل وهو كايغمز بعينيه ورافع حاجب واحد بسخرية فتجاهلو جبل ومابغاش يجاوبو ولتافت عند الكارسون عيطليه حتى قرب لعندو وقال بالإسبانية
-واش عندكوم واحد الگاطو اش كانت سميتو ...؟؟
قالها وهو كايشوف فرافاييل بتسائل فرفع رافاييل كتافو بإستفهام وقال:
-وباش غانعرف أنا ؟؟
لكن فاش تفكر جبل اسم الحلوى لي كلاها عند روعة رجع شاف فالكارسون وقال:
- اه .. المورانچ ... سميتها المورانچ .
هز راسو الكارسون بالنفي وقال :
- لا اسيدي مكاينش مكانحضروش حلوى رخيصة بحال المورانچ حنا مطعم فاخر ، ولكن كاينين أنواع أخرين بحال..كيك سوفلي ..و الوافل.. و شوكليت براوني
قاطعو جبل وهو كايقول بصرامة
- صافي مابغيت والو تقدر تمشي .
تنهد جبل بإستياء وتكى على ظهر الكرسي فغمزليه رافاييل بعينيه وقال:
-أشنو تما ؟ ... واش غادي تعاودلي ولا نبدا نسول فيك ؟
قلب جبل عينيه بملل وقال:
-مامستاعدش لتحقيقاتك السخيفة أرافاييل.
-إذن نبداو على بركة الله ... علاش كنتي واقف فداك الحي ؟... شنو لي وصلك لتما ؟... وعلاش ماديتيش معاك سيارتك ؟
تنهد جبل ثم دور وجهو للزجاج المطل على البحر وقال بهمس :
- كنت فدار الأنسة روعة .
توسعو عيون رافاييل وقال بفضول:
- واش تما كاتسكن الأنسة روعة ؟
أومأ جبل براسو ورد عليه:
- ماشي غير الأنسة روعة حتى الدكتور ياسين كايسكن فنفس الحي .
وضع روفاييل الأعواد الصينية من يديه وقال بفضول قاتل :
- إيوا شنو كنتي كادير عند روعة فدارها ...
غمر بعينيه وكمل...
- ياكمااااا... !!
شاف فيه جبل بغيظ وقال:
- ياكما اش!؟ ... سير أصاحبي غسل دماغك راه موسخ ...الأنسة روعة ماشي ديال داكشي لي كايحسابلك ... اااخ ماكرهتش نضربك.
قلب رافاييل عينيه بغيظ وقال :
- وأشنو بغيتيني نفهم من وجودك معاها فدار وهي ساكنة غير بوحدها كيف سمعت .
إعتدل جبل فچلستو ووضع يديه على الطاولة وقال:
- عندي رغبة نكون أب .
توسعت إبتسامت رافاييل وقال:
- اووه صافي قررتي تدخل للقفص الذهبي ، إذن روعة هي لي ختارها قلبك!؟.
رد عليه جبل ببرود متصنع:
- روعة هي لي ختارها عقلي ماشي قلبي ولكن ماشي للزواح
-وكيفاش يعني ؟
رد عليه جبل بتوضيح
-بغيت نستأجر الرحم ديالها لمدة تسعة أشهر تولد مني .
توسعت عيون رافاييل بقوة الصدمة ، ماقدرش يستوعب طلب جبل الغريب فتنهد جبل وقلب عينيه فاش لاحظ نفس نظرات الصدمة كانت على وجه روعة قبل ساعة ..
تمتم رافاييل بغير إستيعاب:
- وهي قبلات ؟
حرك جبل رأسو بالنفي فقال رافاييل بعتاب:
-وأكيد جرات عليك من دارها ... !!
قلب جبل عينيه بغيظ وإكتفى بالصمت فقال رافاييل بغضب وهو كايضرب يديه على الطبلة :
-عبرت عليك وتستاهل أكثر ، أنا لو كنت فمكانها نلوحك من السرجم مانحتاجش عاد نحلك الباب ....
زفر جبل الهواء من فمو بغيظ فمرر رافاييل أصابعو بين خصلات شعرو بغضب وكمل وهو كايقول :
- واش نتا مستوعب حجم طلبك الغبي شنو يقدر يدير فالمستقبل !!.... واش عمرك عشتي بلا أم ونتا صغير؟ ... إلى ماكنتيش كاتفكر فالبنت مسكينة فكر غير فولدك ملي غادي يتزاد ، فاش غادي يسمع الأطفال لي قدو كايناديو على أمهاتهوم وهو لا ...، فالوقت لي صاحبو غادي طلاقاه ماماه فباب المدرسة هو غادي يلقى سائق ضخم ماعندو حتى علاقة بعاطفة الأم وماغاديش يستقبلو بالأحضان ... ماغاديش يلقى الحنان ديالها واخا تجيبليه مليون مربية ... غادي يكبر أه ولكن غادي يبقى قلبو ولسانو مشتاق باش ينطق إسم ماما ... غادي يكون إنسان فارغ بحالي تماما . أنا لو كنت نلقى الأم ديالي لي لاحتني فباب الخيرية غادي نضمها لصدري لمدة 31 سنة باش نعوض كل نهار ضاع مني بعيد عليها ... نتا راك غادي تكون رتاكبتي ذنب كبير فحق ولدك ولا بنتك اصاحبي .
بقا جبل غير ساكت وكايفكر فالهضرة لي قال رافاييل ثم غمض عينيه بتعب وقال :
-وشكون قالك أنا غادي نحرم ولدي من ماماه ؟؟؟
شاف فيه رافاييل بغيظ وقال:
-إذا كان هاكا إذن علاش ماتوزجهاش؟؟
تنهد جبل وقال وهو كايفكر :
- أبدا مامستاعدش نصنع لنفسي نقطة ضعف لي يقدرو يستغلوها الكاريبي ضدي .
ضحك رافاييل وقال بإستهزاء:
-من نيتك !! ... هداك داك لولد لي غاتولد ليك روعة راه أبكبر نقطة ضعف ... شفتك مابقيتيش مركز اجبل .. وختك تاليا حتى هي نقطة ضعف .
تكى جبل على الكرسي وقال بصوت مبحوح وتعبان:
- تاليا ختي ماغانخليهاش هنا ... فكرت من شحال هادي أنني نسيفطها تقرا فلندن وتخوي إبيزا ..
توسعو عيون رافاييل بصدمة فاش استوعبد أنه ممكن مايبقاش يشوف تاليا ... مد جبل يديه ولمس كأس القهوة وقال وهو كايشوف فالكأس بشرود:
-أنا ماشي إنسان ضالم حتى لهاد الدرجة لي وصفتيني بيها ومانقدر نضلمها لا هي ولا ولدي ... روعة إلى قبلت العرض ديالي ... غادي نديها لشي بلاصة بعيدة ...حتى تحمل وتولد وتربي ولدنا وترويه بحنانها ويشرب حليبها ويكبر ويولي راجل ... عاد نجيبو عندي يشد بلاصتي وياخد أملاكي ... وعلاش لا تولدلي كثر من ولد ...
إبتسم بهدوء وكمل :
- تلاتة ولا ربعة ولا حتى عشرة من ديما عزيز عليا تكون عندي عائلة كبيرة ... وروعة هي أحسن أم تقدر تربيلي ولادي ... لكن تربيهوم بعيييد
ضحك رافاييل بإستخفاف وقال :
- تولدلك بلا زواج ... من نيتك اجبل .
تنهد جبل بتعب ثم إعتدل فجلستو وناض وقف متجاهل كلام رافاييل لي كايستافزو
- فين غادي ؟
قالها رافاييل بإستفهام وهو كايشوف فجبل لي طلب من الكارسون يجيبليه معطفو .
- كمل ماكلتك أنا غادي نمشي كانحس براسي عيان
ناض حتى رافايل وطلب حتى هو معطفو فقال جبل بصوت تعبان:
-كلس كمل ماكلتك.
لكن رافاييل جاوبو بعناد:
-سديتيلي الشاهية ... غادي نوصلك .
-مكاين لاش باغي نتمشى شويا على رجلي
قالها جبل فرد عليه رافاييل بإصرار:
-مايمكنش نخليك بوحدك ، ورجال الكاريبي على القرص كايتسناو غير الفرصة
ضحك جبل بسخرية وقال:
- ياكما ضارب بيا لكاغيط وخايف لايخطفوني ليك .
شاف فيه رافاييل بإستياء وقال :
- لا ولكن خصني نوصل لعروسة لدارها
ضحك جبل بسخرية وعطا لرافاييل ضربة لمؤخرة راسو وخرج وخلاه كايتمتم ويغوت :
- هيييه اجي خلص قهوتك اصاحبي !
رد عليه جبل بسخرية وهو مكمل طريقو :
-فين كانعرفك قالك صاحبي لاواه لبطيخ ... مكانحملش رجال الشرطة
__________
نهاية الفصل :