يوم جديد حل على دار روعة ... اليوم الأحد مكاين خدمة .. صبحت ناعسا حتى 11 ديال نهار وسدت باب غرفتها مزيان باش مايفيقهاش شادو ... لكن مع الاسف صوت نباحو كان كايتسمع للزنقة ..
حيدت روعة الغطاء من فوق جسمها وناضت وهي كاتحك فراسها بيديها بجوج وكأن عش ديال القمل ساكن فشعرها ثم مدت يديها مسحت بقايا اللعاب الناشف من جنب شفايفها ودموعها الناشفين ...قربت من لكوافزر ديالها وشافت فلمرايا ...لكن غير جات عينيها على منظرها شهقت بالخوف وقالت:
-بسم الله الرحمان الرحيم .. باسم الله الرحمان الرحيم ... إنصرفي أيتها الأرواح الشريرة...اعود بالله من الشيطان الرجيم ..
بسرعة هزت المشطة من فوق لكوافوز وبدات كاتمشط شعرها وكاتمتم بين شفايفها :
-يحسن عوان لي غادي يتبلا بيك اروعة .. الزغبي غادي يبقى فيا حيت غادي يصبح على شرابوڤا ديال الموزنبيق بشعر نيكي ميناج كل صبح ...
أشارت بصبعها للمراية وقالت :
- نتي غادي طلقي فالنهار الثاني ديال عرسك ... ها وجهي هاااا وجهي إلا صبر على هاد السحنة شي بوركابي .
مدت يديها ونفخت فيها شويا من نفسها وشماتو حتى تقلبت معدتها فغوتت بقرف وقالت:
-اووع ... اش هاد ريحة ديال زبل لي ففمي ... وكأنني تعشيت فالزبالة ديال نهار العيد ... هادشي غير ماتعشيتش يا حسرا ...
سكتت شويا فاش تفكرت راسها بأنها ضربتها الفيقة مع الثلاثة ديال الليل و مشات للكوزينة هزت كاع الماكلة لي فالثلاجة وحطتها على النموسية وبدات تاكل و تبكي غير كاتفكر شنو وقاع ليها مع جبل حتى شبعت و تنفخت كرشها عاد رجعت تنعس.
ضارت وشافت فالسرير ولقاتو كولو عامر بكواغط بيمويات والشيبس و قشور الماندارين و البانان والتفاح .ومعلقة والخاوي ديال الياغورت فالأرض وعلى السرير ... فقلبت عينيه وقالت بسخرية :
- ااه ... بما انني كنت ناعسة وسط زبالة فضروري غاتكون ريحة فمي بحال الزبالة ... تف تف تف باسم الله عليا لانعين راسي يخليلي كريشتي وشاهيتي ... نعس حتى وسط بوخرارب كولشي على لاطاي ...
ضارت لعند لمراية وهي واضعة يديها على خصرها وكأنها عارضت ازياء ثم غمزت راسها بمياعة وعضت على شفتها السفلية وقرست خدها وقالت لنفسها وهي كاتشوف فلمراية :
- غزيييولا ...تبارك الله والصلاة على نبي رسول الله ...شفتني بعين الرحمة ... ويلي با على تيتيز ... يحرق طواااسلك اجبل لمجبل .. هاد الزين كامل يستاحق غير مليار ...تف فوسط كمارتك البزناز لحشايشي
بدلات حوايجها وهي كاتشطح على أغنية العلوة لي طلقتها بأعلى صوت فالدار في محاولة أنها تنسا كاع لي وقاع ليها بالأمس مع جبل بغات تعوض كاع دوك دموع لي غرقت فيهوم فالليل بشويا ديال الناشاط والضحك واخا غير مع راسها .
حلات الباب اخيرا ولقات شادو كايتسناها وكاينبح حيت فيه الجوع فغوتت بأعلى صوتها وقالت وهي كاتنقز وتشطح :
- شادوديييي ... اليوم عطلة تيرارارا ... خلينا نجمعو شطايطنا ومانباتوش هنا مي دادا عدا عدا ...
بدا شادو حتى هو كاينقز ويشطح براسو معاها وينبح بصوت مجهد ...فرفعت روعة صبعها الوسطاني وكملت لغنا :
- وجبل فهدا عدادا . اويلا بغا لولاد يمشي لشي عاهيرا .. عاود اخويا عاود واحد جوج تلاتة ... اوبسوريا عاود واحيد إثنين ثلاثة .
بدات كاتخمل فالدار وتجمع وتقاد وهي كاتشطح مرة على الشعبي وتحير و مرا تقلبها شرقي وتلوز ومرة غربي ودونسي حتى استوقفها صوت ديال جرس الباب فبسرعة عوطت حوايجها لمبهدلين وقربت من الباب وغير حلات الباب
تاليا/اسية: ااااااااااااااااااااااااااااااااااه
غوتو اسية وتاليا بقوة باش يخلعو روعة لكنها مادارت حتى شي ردة فعل تذكر بل علات حاجب واحد وشافت فيهوم بغيظ وقالت .
-ياك لاباس ..!!
شافو أسية وتاليا فبعضياتهوم بدهشة وقالت تاليا :.
- ولك تقبريني ... كان خصك تخلعي زعما !!
وقالت أسية :
-أواااه وعلاش ماتخلعتيش !!.
ضحكت روعة بسخرية وقالت وهي كاتكحز من الباب باش تخليهوم يدخلو :
- ياااربي على الذكاء الخارق ديالكوم ... واشنو كادير هاد العين السحرية لي فالباب .
شافو أسية وتاليا فبعضياتهوم بغباء وقالو :
تاليا : العمـــــى😮
أسية: هــــــــاء😒
ضحكت روعة لكن ملي شافتهوم داخلين بصبابطهوم غوتات بغيض:
- هااااي هااااي هااااي على تكلبييييين .... انا عاد سيقت الدار حتى تقسملي ضهر ونتوما داخلين بهراكسكوم .
قلبت أسية عينيها بملل وحيدت صباطها وحطاتو فالخزانة لي مور الباب وقالت بغيظ:
- جينا نفوجو عليك زعما 🙅
وكملت تاليا وهي كاتعوج فعينيها :
-ولاهيييييييلا😕
دخلت روعة للمطبخ وهي كاتقول بصوت مرتفع باش يسمعوها :
-جيتو تسيزيوني ... غير باش نعلمك ااسية .. القهوة تسالات ومازال ماشريتها .
شهقت أسية بصدمة وقالت:
- شناهواااا ... راه ماشربتهاش هاد صبح عوالة عليك زعما
طلات روعة من باب الكوزينة وقالت بسخرية وهي كاتغمزها بخبث:
-سيري عند حبيب القلب يشريه اليك ... سعدات لي عندو علامن يتفشش.
قلبت أسية عينيها بغيظ وقالت:
-اصلا دابزنا ...
شهقت تاليا بدهشة وخرجت روعة كاتجري من الكوزينة وتلاحت على الاريكة بحال شي إعصار ... شدت فأسية وقالت:
- ياااااااي ... الحماس غادي يبدا ...عاوديلي شنو وقاع؟
وقالت تاليا :
-اه عاودي لينا شنو وقاع ؟
تنهدت أسية بحزن وشافت فالأرض ثم قالت بصوت حزين :
- لبارح مشيت زعما باش نشوفو فالمكتب ديالو فالطبيب ...وانا نلقاه واقف مع واحد الزعرة إسبانية وكايضحك معاها ...
تنهدو تاليا وروعة بتأثر (😞 😦) ثم كملت أسية بحزن :
- بقيت واقفا قبالتو على الله يشوفني ... ولكن ولد الهم ماداهاش حتى فالجايحة الكحلة لي ضربتني ... لا وباش يعجبك كايضحك ويحط يديه على كتفها ... عرفتو بغيت نتفو بغيت نريييشو بقوة الفقصة😤 ... وفواحد اللحظة وهي تبوسو ديك الزعرا سفريطة الكمارة .
شهقو تاليا وروعة بصدمة وقالت بروعة بحماس
-واش باستو من شفايفو ؟؟😮
خنزرت فيها أسية وقالت:
-باش نشدو من قرجوطتو ونقطع فيماه النفس ... هاه إيوا صافي ... قالت باستو من شفايفو قااال😱 ...باش نجرجر والديها مع دروج ديال داك الطبيب ونشطب بيها شوارع إيبيزا ... راني جزائرية وولداتني كرش حرة نديرها ونفوتها.
-إيوا ومن بعد اش وقاع .
قالتها تاليا وهي كاتشوف فأسية بفضول فردت عليها اسية بغيظ
-غير شافني وهي تقطع فيه النفس ... ولد لادينة بدا يدخل ويخرج فالهضرة ..
-وشنو قلتيلو نتي ؟
قالتها روعة فردت عليها اسية بحزن وهي كاتشوف فيها :
- صرفقتو وخرجت مع الباب 😞.
غوتو تاليا وروعة بحماس وبداو كايموتو بالضحك(😹😸) وهوما كايتخيلو ياسين الدكتور الجراح بقدر قامتو كاياكل السقل من عند أسية ...
- اااخ ... كرشي حرقتني بالضحك يعطيك موصيبة ااسية .. بدموووع بالدموع 😂
قالتها روعة فقلبت أسية عينيها بملل وقالت :
-نتوما لي جا معاكوم الضحك .😠.
قاطعتهوم تاليا وناضت كاتجري بسرعة للباب فين خلات صاك ديال البلاستيك وهزاتو ورجعت وهي كاتقول :
- حزر فزر ... اشنو فهاااااد لبلاستييييييك ؟..
قالت روعة :
- شميت ريحة البطاطا
وقالت اسية :
- ااام ... سقاطا
قلبت تاليا عينيها بغيظ وقالت :
-لاواه لبعابع 😑
حطت البلاستيك على الطبلة وجبدت منها علبة بيضاء قالت :
- هادي شهيوة من عند خالتي تيماء الله يعطيها الصحة .
ناضت روعة كاتجري للكوزينة جابت لمعالق والخبز والموناضة وحطتهوم على الطبلة وهي كاتحس بالموت ديال الجوع حيت مافطراتش ...
حطت تاليا الطاسة على الطبلة ورجعت دخلت يديها فلبلاستيك وقالت بحماس:
- وهاديييييي..... لا ... لا بلاتي ...خصها شي تقديم يكون واااعر ... فرفورو ... فرافيرو .
خدا كل واحد بلاصتو وإستعدو باش يبداو ياكلو ... كلست تاليا على الأرض بحماس و خرجت علبة المفاجئة وكان فيها (فرفورو) فروج مشوي .... حلاتها واستنشقت عبييير ريحتها بهيام ثم حطتها على الطبلة ...
-اااح ريحتها كاتشهي ..
قالتها روعة ومدت يديها باش تاكل لكن تاليا غوتت وضربت يد روعة قبل ماتلمس الفروج
-بلاتي ... مالنا على هاد الزربة
عاندتها أسية ومدت يديها باش تاكل لكن حتى هي كلات دقة على ديها وسحبتها وهي كاتحك فيها بألم ...
حمحت تاليا وقالت وهي كاتشوف فيهوم بتحذير :
- احم... حتى شي واحد ماغاياكل من هاد الفروج حتى تسمعو قصة حياتو ...
قلبت روعة عينيها بملل وقالت :
-ايوا صافي هادشي لي بقا ...
لكن تاليا جرت الفروج عندها بعناد وقالت :
- كان يا مكان في قديم الزمان .... مابقا فالميدان غير ولد حديدان ... قبل مانتفقص من البيضة🐣 مشاولي 18 لأخ وأخت 🐓🐔...خمسة مشاو فلقلي الله يرحمهوم🐣 ...و 12 مشاو فصليق 🐤... اواحد سلت من السلة ولي هو انا (🐥) والباقي داوهوم للمسلخ .. الله يرحم ترابهوم 👼.. منهوم لي ولاو مرتديلا 🍗 ومنهوم لي تشرملو ومشاو للعراسات🍲 ... وشي تكدس فوق بعضو ومشاو فشاورما 🍢🍡... ومنهوم لي بقاو كايدورو على الشواية ويدورو ويدورو ويدورو ولا طلع ليهوم القلب ولا داخو🍖 ... ولكن هادشي لي وقاع كوووم ... ولي وقاع معايا أنا كوم تاااني🐓 ...
شدتهوم حكاية الفروج وحلو أسية و روعة ودنيهوم مزيان باش يسمعو لكمالة:
- فواحد نهار ... مشات واحد لمرا غليضة للسوق سميتها تيماء وشراتني وكنت مدبوح داكساع ودمي سايل ... خرجتني من لفريكو ديال المارشي وداتني معاها للدار ... انا فرحت وقلت غادي ديرني بحااااال ولدها ... واحد الشويا وهو يدخل واحد الرجل مكلضم سميتو جبل وقال لديك لمرا لي سميتها تيماء ...وجديه لينا للغدا راه تشهيت عضيماتو ... انااااا تخلعت😱 ... اناااا تزعزعت😲 ... لكن فواحد اللحظة دخلت واحد البنت للكوزينة وقالت بأعلى صوتها ... لاااااااا ماتقيصوش فيه ... أناااا فرحت😁 ... أنااااا شطحت😀 ... وهي تقول ديك السفريطا ..اليوم باغيا نمشي نتغدا عند ختي روعة شويه لينا على الفاخر وكتري لينا لمساخن .... غوت جبل وقال ... وهاد روعة ديالك مالها ماتجيش تتغدا هنا وناكلوه جميع اش كاتحسب فراسها ؟
قلبت روعة عينيها بغيظ وقالت بلغوات :
- كانحسب فراسي جيجي حديد وهو مالو ؟ ...
بقات تاليا مسمرة كاتشوف فيها وكاتفكر "هادي مالها كاتغوت بوحدها بحال شي معزة" ... فقالت أسية بتوضيح ..
-حبيبتي روعة واقيلة هادي غير حجاية .. ياك اتاليا ؟
تنحنحت روعة بإحراج ثم قالت تاليا ببساطة وهي كاتقلب عينيها :
- هادي حجاية من واقع اليوم ... واخليوني نكمل ..
سكتو لبنات فخطرا وكملت تاليا وهي كاتقول :
- قالت ليه ديك السفريطا ديال ختو ولي هي أنا ... روعة اليوما الأحد مكاتخدمشي ... وهو يتنهد وقال .. وعلاش بسلامة ماتخدمش نهار لحد ياك دون ماركيز كايخلصها ! ... وهي تقوليه ديك السفريطا ديال ختو ... راه حيت أنا مكاتقراش نهار لحد هذا لاش ! ... تعصب عليهوم داك جبل وقال بلغوات وهو كايعيط للدون ماركيز😈 ... اجي نتا علاش مخلي ديك روعة كالسا واش كانعطيوها لفلوس باش تصبح ناعسة نهار لحد على الأقل تجي تعاون تيماء فشغال الدار ..
غوتت روعة بصدمة وقالت :
-شنو هوااااا .... هاد خوك بلا شك حمااااق
تنهدت أسية بخيبة أمل وقالت :
- لا راه ماحماق ما والو ... البارح فالليل علمني باش نخوي ليه المكتب ديالي حيت غادي ياخد مكاني ..
شهقت روعة بصدمة وقالت :
- غاب عام ونصف وراجع بعجاجتو ... والله الى تبارك الله عليه ... ونتي واش غادي يجري عليك .؟؟
مدت أسية يديها وجرت الفروج لعندها ...قطعت منو طرف وعضاتو بسنانها ثم قالت وهي كاتمضغ :
- لااا ... راه هو مول الشي وطبيعي يبغي ياخد منصب الرئيس التنفيدي للشركة وأنا غادي نكون المديرة ديال العمال ... أصلا عادي واخا نزلت كراد من خدمتي إلا أنه زادني فالراتب ثمن الضعف .
ضيقت روعة عينيها بشك وشافت فالفروج ثم قالت :
- هادشي ماشي عادي ... انا دخلني فيه الشك !!
قلبت تاليا عينيها بملل ثم جرت الفروج لعندها وقطعت طرف حشاتو ففمها وقالت :
- تقبريني ... بلا تحليلاتك السخيفة ونظريات المؤامرة كولي راه الفروج تسالات خبيرتو و مشات مع الواد .
تنهدت روعة بغيظ لكن فاش شافت نظرت شادو البريئة لي كايديرها فيها باش تعطيه طريف من الفروج تأثرت وناضت قطعت نصف الفروج تحت انظار أسية وتاليا المصدومين من فعلتها وحطاتو فصحن شادو لي نقز بالفرحة ومشا كايجري باش ياكل حقو لكن فاش ضارت ولقاتهوم مطرطقين
(😶😶) عينيهوم فيها تنحنحت وقالت ببساطة :
- احم ... مالكوم كاتشوفو فيا؟؟ ... صافي مشات خبيرة الفروج مع الواد وأنا وشادو بقينا مع بنات لبلاد ... خليوه ياكل مسكين حتى هو
خنزرو فيها لبنات وحناو راسهوم على الماكلة وماعلاوه حتى شبعو كروشهوم ....تغداو مجموعين وضحكو شويا ونشطو ولعبو حتى دارت 6 ديال لعشية ومشاو بحالهوم فدخلت روعة بدلات حوايجها على السريع ... لبست سروال اسود ومونطو طويل باج وطلقت شعرها الأحمر على أكتافها وخرجت كاتجري حيت تعطلات على خدمتها .... نزلت كاتجري مع دروج فاش لقات المصعد مشغول و ركبت فسيارتها وانطلقت بسرعة .
____________
هوتيل سود إبيزا سويتس / وسط المدينة / الساعة السابعة مساء .
وقفت روعة سيارتها أمام باب الهوتيل لي كاتخدم فـ النادي كلوب ديالو ولاحت المفاتيح لرجل الأمن وقالت باللغة الإسبانية وهي فطريقها للداخل :
-بِينْجَمان ... سيارتي الله يحفضك .
تنهد بينجمان بغيض وتحنى هز المفتاح من الأرض ومشا وهو كاينكر حيت هادي ماشي خدمتو .. هو مسؤول على امن البوابة الرئيسية ماشي حارس ديال السيارات .
دخلت روعة لغرفتها لي فالكواليس وغيرت ملابسها بسرعة ... لبست سولوبيط أسود مزير من الرجلين حتى لخصرها وصدرو على شكل قلب كاشف نصف صدرها وأكتافها وطالون أسود لامع .
طلاقات مع المغنية لي كانت قبل منها وتبادلو التحيات فالممر ثم طلعت على المسرح وغير هي بانت ليهوم بداو تصفيقات الجمهور لي متكون نصفو من عاهرات ورجال أعمال ونساء مخمليات برجوازيات كالسين بكل خيلاء على مقاعدهم وشي هاز فيديه كأس ديال الويسكي الفاخر أو تيكيلا والڤودكا وشي فيديه اغلى أنواع السيگار وكايدخنو بشراهة ...
تطفات أضواء النادي القوية وتشعلو الأضواء الخفيفة والملونة فكل مكان ... كانت روعة كاتحس بالتوتر لي كايشدها فكل مرة قبل ماطلع أعلى المسرح ... تقدمت لعند الميكرفون وتمسكت بيه بيديها ثم عطات إشارة للفرقة الموسيقي باش تبدا العزف ...
كانت منسجمة مع الموسيقى قبل ماتبدا تغني لكن لفت نظرها فلاش ديال شي تلفون تشعل وتطفي ...حققت فيه مزيان وحاولت تكدب عينيها فاش عرفت شكون هو ... شعرت بالقلب ديالها كايدق بسرعة .. وماعرفتش واش بسبب الخوف أو شئ اخر .
كان جبل كالس خلف وحدا من الطاولات وداير رجل فوق رجل بخيلاء وكايشوف فيها وعلى ملامحو مرسومة أكبر إبتسامة فاتنة بارزة غمازة دقنو الملتحي بالخصوص فاش جات عينيها على عينيه الزمردية .. كان وسيم بحال شي ممثل هارب من هوليوود ... إلتقط ليها صورة أخرى بتلفونو الأبيض وهو كايبتاسم بمكر .
كان شاد بين يديه كأس ديال الويسكي لمخلط مع تيكيلا رفعو شويا أمامها وكأنه كايحيها بيه وأمامو كان كالس المدير ديال الهوتيل لي خدامة هيا فيه وكايهضر معاه ويبتاسم بإهتمام لكن جبل كان عقلو وتركيزو مشغولين مع ديك البنت لي فوق المسرح كاتبان متوترة ...
كانت خايفة وكاتفكر ...إذن هو فاش قالها غادي نكون أسوء كوابيسك هو مقالهاش عبثا وإنما كايحاول يطبق وعدو ليها وكالس مع مديرها ... بلا شك هو كايوسوس ليه باش يطردها من خدمتها ... تمنات من الله فقلبها أن هاد الليلة تنتهي على خير
كانت باغيا تبين ليه بأي طريقة أنها ماشي ديك البنت لي كايضن أنها رخصية رغم أن ماضيها كان خايب إلى انها تغيرات وولات بنت جديدة ... كانت خايفا منو وهي عارفاه يديه طويلة وإلى بغا يقطع ليها رزقها ماغاديش يتردد ....
قربت الميكرفون لفمها ثم غمضت عينيها بهدوء وبدات كاتغني بصوتها الجميل كلمات
لأغنية" never be the same "
للمغنية " jessica mauboy "
(ركزو على الكلمات )
دعوني أخبركم عن الفتاة التي اعتدت أن تكون،
نفس الاسم نفس الوجه ولكن مختلفة عن من أكون
لم تكن تعرف بما كانت تفكر
لم تكن تعرف أن عالمها يغرق
كانت أحلامها مكتوبة على ورقة في يدها،
كانت متمسكة به بقوة لكنها لم تكن تفهم،
الحب والألم الذي إستبدلته
كان ماضيها الذي يجب ان تمحيه
جميعنا نضيع أحيانا وننسى من نكون
في مكان ما على طول الطريق، جميعنا نجري في سباق مجنون
لا نفكر أبدا في القلوب التي نحطمها
وكما تبدأ أملنا تتلاشى بعيدا
الامور لن تعود كما كانت ابدا
لأنك تكونين واقفة وحدك تماما
وتفقدين كل شئ عرفته
أنتم تحدقون في وجه مختلف
الامور لن تعود كما كانت ابدا
أتمنى ان اشارك في وجهة نظر مختلفة
لكن الكلمات تخرج ولا تنطق بالحقيقة
انت لن تعرف بما كنت أفكر حقا
والأن عدت إلى الفتاة التي تغرق
اغرق الى اسفل العالم الذي ينتظرني
ولا اريد ان ابقى هنا بعد الأن
كلما فزت اكثر كلما اردت اكثر
لا ينتهي الامر ابدا ولا يتوقف
لا لن يكون الامر كافي ابدا
https://youtu.be/dGOuiu0dA7o
إلى أن سالات الأغنية وحلات عينيها بهدوء و شافت فجبل .. كانت متوقعة أنه غادي يكون كايدير فيها نفس الشوفات الشيطانية ، لكن ملامحو كانت هادئة وكأن الرسالة لي بغات توصليه من كلمات الأغنية وصلو ليه ...
مرو بضع لحظات وكانت روعة كاتغني وكاتحاول ماتشوفش فجبل لي مكانوش عيونو المزردية كايزولو عليها حتى شافتو عيط للكارسون وعطاه ورقة ثم أشار بيديه ليها ، فأومأ الكارسون براسو وإبتسم ثم قلب الدورة ومشا لعند روعة لي كانت متبعة كل حركاتو بعينيها حتى وصل لعندها وعطاها الورقة لي كانت فالأصل مجرد كلينيكس فحلاتها بفضول وكان مكتوب فيها
" لم تبعدك المسافات عني يا ذات العيون الشمسية.. فأنا أعيشك بين يوم قد مر ويوم أتى ... فكلمات الأغاني لا تأثر بي لكن قبلة من شفاهك الزهرية تستطيع ان تحذث فرقا "
شافت روعة بغيظ فجبل لي إبتسم لها برحابة صدر حتى ظهرت غمازاتو الفاتنة ... وفكرت ان هاد الرجل اكيييد اكيييد عندو العقل بين رجليه ماشي فراسو .
دازت ساعة وهي كاتغني حتى نشف حلقها لكن فواحد اللحظة كانت روعة كاتغني اغنية رومنسية هادئة حتى كاتشوف واحد الزعرة قربت من طاولة جبل وسلمت عليه بالوجه وكلست ... ماعرفتش علاش روعة شعرت بقلبها كايحرقها ...واخا هي رفضاتو وصداتو لبعيد .. لا وسباتو مزيااان ....
قالت فنفسها :
- اووه اكيد حيت ماكليتش مزيان ... نصف الفروج كلاه شادو ... يمكن هذا علاش قلبي كايضرب هاكا ... اكيد هادو علامات انخفاض الضغط مافيهاش الشك ... الله ياخد فيك الحق أشادو كليتي نصف الفروج غير بوحدك
تجاهلت روعة وجود البنت على نفس الطبلة لكن تصدمات فاش شافت جبل وقف ومد يديه بكل جنتلمانية للبنت الزعرا وهي قبلت بكل فرح وبدات كاتبتاسم والجمال ديالها كان ضعف جمال روعة فبدا قلبها كايحرقها ديال بصح..
تقدم جبل هو والبنت لمنصة الرقص وتمسك بخصرها وهي حطت يديها على أكتافو وقربت وجهها من وجهو وهيا كاتهمس بكلمات بااينا غايكونو مغريين وصوتها غادي يكون مثير ...
لكن فاش لاحظت جبل عض على شفتو السفلية وهو كايشوف للبنت فعينيها .. ماكرهتش دكساع تعطيه بالمكرفون للراس تقسمو على جوج وتسيل دمو ...
لكن روعة عاقت باللعبة بالخصوص فاش رفع راسو وشاف فيها وغمرها بمياعة ثم رجع شاف فالبنت وتمتم بكلمات بصوتو الرجولي قدرت تقرا شنو قال غير من حركات شفايفو ...
- ريحة بارفانك زوينة
إبتسمت البنت الزعرة وردة عليه وهي كاتقرب من ودنيه:
- هذا من دوقك احبيبي
تأكدت روعة أنه كايدير دوك الحركات غير باش يثير إنتباهها ...لكن هاهاااي ... ستلقنه درسا في المياعة على حقها وطريقها ..
ضارت لعند عازف الباطري وقالت بالإسبانية و بصوت مجهد باش يسمعها :
-ماركوس ...واش عاقل على الاغنية لي دربنا عليها داك نهار .
هز ماركوس راسو بحماس وقال :
-واش اغنية te amo
رفعت روعة اصبح الإبهام 👍 وقالت :
- هي هاديك ... غادي نوضو الكلوب هاد نهار تافقناااااا
غوت ماركوس وقال:
-تافقناااااااا .
ضارت روعة وحيدت المكرفون من العمود لي كا ملسق فيه وعطات اشارة لماركوس والديدجي باش يوقف العزف وداكشي لي كان ... توقف العزف وتوقف جبل والزعرة على رقصاتهوم المايعة وانتبهو كاملين لصوت روعة لي كانت نازلة من المسرح لساحة الرقص وهي كاتقول فالمكرفون باللغة الإنجليزية :
-اش بان ليكوم نبلبلوها اليوم ...؟
تسمع صوت هتافات الجمهور وتصفيقاتهوم وناضو من اماكنهوم وتجمعو عليها فساحة الرقص تحت انظار جبل لي كان عاقد حواجبو وكايشوف فهاد المجنونة لي تسيفات فخمسة دقايق وفجنبو الزعرة كاتشوف فيه ومافاهما والو .. السيد عاد كان كايضحك معاها ودابا قلب حواجبو ثمانيتون .
قالت روعة فالميكرفون
-واااااااش غاااااااادي نوضوهــــااااااااا اليييييووووووووووووووووووم
هتافات الجمهور : واااااااااااااااااااااو
روعة- واش غادي نبلبلوها ليوووووووووووووم
هتافات الجمهور : واااااااااااااااااو
بدات الموسيقى الصاخبة وكولشي بدا كايشطح على انغام اغنية tiw tiwل ...te amo فقالت روعة بصوت مرتفع :
- ايديسون ديدجي كاميلو اووووووو كارلوسييييييي ...
تبعوها هتافات الجمهور وكملت وهي كاتشوف فجبل وغمزاتو كيف غمزها بمياعة وقالت :
- وهادي فخاطرك اسي جبل ..
ضحك جبل بإستهزاء وتمتم بين سنانو :
-هه ... هادي بلا شك حماقت .
دخلت روعة وسط الجمهور وبدات كاتشطح بجنون وتغني بصوتها الجميل ...
-سمحيليا امدامتي ... انا نبغي ميمتي ....وواااااا سمحيليا امدامتي انا تبغي ميمتي ... ميمتي لحبيبة ديالي ... ومكاين غير نتي ... يحيا كاع المغاربة وعمي جبل بزااااف بزااااف
وكملات وهي كاتشوف فيه بتحدي :
- ياو تيامو تيامو هييييي ... نجيب لميمتي دياموند هييييي ... تيامو تيامو ...هييييي ميمتي حبة دياموند .
بداو الرجال والنساء كايشطحو بطريقة مايعة وشي كايتلصق فشي والاضواء كايطفاو ويتشعلو تناغما مع الموسيقى وبعض الرجال كايقربو من روعة وكايشطحو معاها لكنها كانت محافضة على مسافة بيناتهوم وكاتشطح وضحك وتغني
لكن عيون جبل الغاضبة كانو حاضينها من بعيد وديك البنت الزعرة كاتجر فيه باش يدخلو يشطحو حتى هوما ...
برك جبل على اسنانو بغيظ ثم شاف فيها وقال :
- مافيها باس نشطحو معاك شويا اروعتي .
قرب من طبلتو وهز قرعة ديال الويسكي الفاخر وقلبها على فمو ...شرب منها حتى سالاها وماهتمش للدغة لي خلات فحلقو .... رجع حطها على الطبلة وشد البنت الزعرة من يديها ودخلها لوسط الناس لي كايشطحو وبدا كايشطح ويتلسق معاها بمياعة ويتمايل بجسمو ويرقص على نغمات صوت روعة لي مكانتش شايفاه وهادشي لي عصبو كتر حيت كانت كاتشطح وعاطياه بالضهر وكاتغني .
- تولموند ...كامليييييين .... هييييي هييييييي... هييييي هييييي... هيييي هييييي ...
ردو عليها الجمهور : هيييي هيييي هيييي هيييي
-وراني مانسمع وااالو كولو كااااع هييي هيييي.....هييييي هييييي
ردو الجمعور وهو كاينقزو : هيييي هيييي هييييي هيييي
كولشي كان ناشط وكايشطح ومن حد حتى مدير الهوتيل عجباتو الموسيقى المغربية وناض كايشطح مع روعة وهو كايقول بصراخ باش تسمعو :
-احسن حاجة درتيها اإيميليا بدل الملل لي كنا كالسين فيه
ضحكت روعة بسخرية وقربت منو وهي كاتقول وتحرك فخصرها ..
- سي مارتن ... بحال هاكا حرك خصرك .
ضحك مارتن وبدا كايقلد الشطحة ديالها ويشطح وهي كاتغنيلو وتشطح معاه وتموت بالضحك على الحركات البهلوانية لي كايدير مديرها الشايب الخمسيني .
لكن فاش ضارت تصدمات فديك الزعرة لي كانت معلقة ييديها فعنق جبل وكاتحرك خصرها بحال شي عاهرة وهو كايشطح معاها ويبتاسم .. ويعلي عينيه يقلب على روعة لكن فاش لقاها كاتشوف فيه ..جر البنت الزعرة لعندو كتر وبدا يشطح .
كان كايشطح بإتقان وكأنه شي مدرب ديال الرقص لكن ديك الصفرة لي كانت لاصقا فيه كانت دايرا لروعة لحريق فراسها وماكرهاتش تجرها من شعرها ...
ايه هي صحيح مكاتبغيهش وهو فنظرها رجل عينيه زايغا بلا قياس ومكايحشمش لكن هذا مكايعنيش ان ديك الزعرة تلسق فيه كيف بغات... هو راه خو صحبتها ... اكيد إلى تاليا شافت هاد الزعرة كاتلسق مع خوها مكانش غايعجبها الحال ...
تمتمت بين سنانها :
-إشرف يابن الكلب الشرف .. فينك أتاليا أجي تشوفي خووووك
هادشي لي كانت كاتفكر فيه وكاتحاول تبرر بيه سبب إنزعاجها من ديك الزعرة .... الشرف ماهو أكيد تاليا ماغاديش تبغي شرف خويا يتوسخ بسبب هاد الزعرة سفريطا .
تمتمت عاوتاني بين سنانها بغيظ وهي كاتشوف فيه :
-بقالك غير تخدم شيخة ... يخخخ على الرجلة مشات فداكشي
قاطع تمتماتها مديرها مارتن وهو كايقول ويلوز فخصرو :
-إيميليا ... واش هاكا ؟؟
بغات تسطا بالضحك فاش شافت الحركات لي كايدير مارتن بخصرو ولا كرشو الخارجا لي كانت كاتهز غير بوحدها بالشحمة وبدات كاتضحك وتشطح قبالتو باش يدير بحالها ... قرب منها شاب وسيم (تيتيز😉) وبدا حتى هو كايقلدها وكايضحك معاها وهي كذالك .
لكن فواحد اللحظة شعرت روعة بيدين رجولية تسللت حول خصرها وجسم قوي جرها لعندو ولسقها معاه وهو كايتمايل على انغام الموسيقى وكايشطح...
تعصبت روعة و حاولت تفك دين داك الرجل لي كانو كاتمين أنفاسها لكنها ماقدتش حيت كان مزير عليها فغوتت بغضب وقالت:
- بعد عليا يعطيك موصيبا تصيبك .
كانت كاتقلب بعينيها على رجال الأمن يفكوها منو لكنه همس فودنيها بصوت شيطاني وهو كايغني :
- هييي هيييي هيييي العالم شطحتي معاه ... ودابا جاء دوريييي هييي هييي...
فاش وصلها صوت جبل قلبها بغا يسكت ... رجف جسمها وماقدرتش تتحرك كان كل همها انها تلقى شي طريقة باش تتفك منو بأي ثمن ... لكن فواحد اللحظة دورها جبل لعندو بسرعة وزير على خصرها مع جسمو وقال :
- نموت أنا فعينين لعسل ...
قدرات روعة تشم ريحة الشراب من جسمو وفمو وعرفاتو سكران وماشي فوعيو فغوتت بغضب وقالت:
- جبل بلا بسالة ... طلق مني غادي نعيط ليك لرجال الأمن ...
عض جبل على شفته السفلية وضحك بسخرية و زير عليها ثم هزها من الأرض بسرعة وبحكم انها قصيرة بقاو رجليها معلقين فالهواء وقال بصرامة متصنعة :
-هذا عقابك حيت مزالة كاتهدديني الويلة.
وبدا كايدور بيها ويشطح وهي كاتغوت بأعلى صوتها وكاتحاول تفك منو لكن شكون غايسمعها ولا يهتم لأمرها وهوما كاملين سكرانين وأصوات الموسيقى مجهدة ..
- طلق مني اجبل ولا راه ماغايعجبك حال ... هانا فين قلتهالك طلق مننننننننيييييييييييييي
وبدات كاضربو على كتفو حتى حطها للأرض وبغات تهرب منو لكنه سبقها وجرها من خصرها وعنقها من الخلف وقال فودنيها وهو كايستنشق رائحة شعرها الخزامية..
- رحمي هاد الرجل المسكين وعطيه شويا من وقتك .
شعرت روعة بأنفاسو كاترتاطم مع رقبتها وحست بقشعريرة غريبة خلاتها تغوت بغضب :
- بعد مني اجبل ولا غاندير شي حوايج ماغايعجبوكش
رد عليها وهو كايمرر انفو على عنقها ومغمض عينيه :
-اشنو فجهدك ماديري كااااع ...
- ياااك واخا هانتا غادي تشوف .
قالتها وهزت رجليها حتى هزتها وزطمت ليه على رجليه بمؤخرة طالونها حتى غوت جبل بألم وطلق منها فإستغلت روعة الفرصة وهربت منو ...
تسللت فالممرات ديال لكلوب وهربت باش تمشي للكواليس تتخبع منو فغرفة التزين الخاصة بيها لكنه لحق عليها وهو كايجري متناسي ألم رجليه
-روووووووووعــــة
غوت بيها جبل حتى خرجو عينيه فغير سمعت صوتو زادت فالسرعة وأول باب بانتليها كانت باب ديال الباركينح الإحتاطي ...حلتها ودخلت منها وغير بغات تسدها وهو يعرض جبل الباب برجليه وغوت .
- روووووووووعة ... حيدي مور الباب
خافت روعة من صوتو الشيطاني وبدات كادفع فالباب بكل قوتها باش جبل مايقدرش يحلها وغوتت :
-وااااا بعد مني شكوا بيك لللللللله
لكن خارت قوتها فاش دفع جبل الباب بقوة بكتفو حتى تدفعات معاها حتى روعة لي كانت غادي طيح لكنها قدرت توزن وقفتها وشدتها بجرية وهي مكاتشوفش موراها بقوة الخلعة
تبعها جبل وهو كايجري بأقسى سرعة وشدها من دراعها وجرها بقوة حتى لسقها مع واحد السيارة كحلة كبيرة وحاصرها بيديه بجوج .
- جبل ... عافاك اجبل .. نتا راك سكران اجبل بعد مني الله يرحم ليك الواليدن .
قالتها روعة وهي كاتشعر بالقلب ديالها غايسكت بقوة الخوف من منظرو المجنون وعينيه حومر وكأنهم عيون إبليس وتنفسها كان سريع ..
فغوت جبل فوجهها بغضب وقال:
-وليتي كاترغبي دابا هااااه ....فااااااش كنتي كاتشطحي مع دوك شماااااايت كان عاجبك الحااااال ... واناااااا هااااااااه وانا ماشي راجل كاتهربي مني ...
إبتلعت روعة ريقها بخوف و فكرت أنها تضربو لحجرو وتهرب منو لكن رجعت فكرت انها الى اداتو هو ممكن يطردها من خدمتها مع تاليا فالوقت لي هي محتاجة للفلوس على قبل مماها ، فحيدت هاد الفكرة من راسها وقالت بترجي وهي كاتحاول تدفع جسمو لي كان تقريبا لاسق فيه :
- نتا ... نتا راجل وسيد رجال غير بعد مني وخليني نمشي لعاااااار اسي جبل انا را....
وحلت ليها الهضرة فحلقها فاش شافت ملامحو تغيرات من الغضب للهدوء التااام .. كانت أنفاسو هادئة وملامحو كذالك ... ميل راسو ببطئ وطبع قبلة هادئة على خدها ثم وضع جبهتو فوق جبهتها وغمض عينيه وتنهد بتعب وكأن الجبال فوق أكتافو ...
كانت روعة كاتحس بالقلب ديالها كايضرب بسرعة وديك القبلة خلات كامل جسمها يدق ناقوس الخطر من لمساتو ليها ...ولا فاش إختلطت أنفاسهم وتجانست أرواحهم فشلو يديها ومابقاتش قادرة دفعو :
بقا ملسق جبهتو مع جبهتها ثم مال برأسو لخدها وهمس بصوت مبحوح وتعبان :
- روعتـــــي... إرحميني ياروعــتـــــي
إضطرب تنفسها وإختفت كل وسائل الدفاع العدوانية على إثر همست صوتو الرجولية وأنفاسو الحارة لي كانت كاضرب فرقبتها فغمضت عينيها وإبتلعت ريقها بتوتر .
كان محاصرها بيديه بحوج حول السيارة لكن فاش لاحظ إرتخاء عضلاتها حيد يديه من على السيارة وسحب جسمها لعند جسمو الرجولي وحاصر خصرها بدراعو القوية ...مال برأسو ببطء لكن روعة قاالت بحزم بعدما إستوعبت أن هادشي غادي فمنحتى خاطئ .
-سي جبل هادشي لي كادير فيه راه...
لكنه قاطعها بقبلة قوية على شفايفها ...تصدمت روعة وتوسعو عينيها من قبلته المفاجئة ولا طريقتو الإحترافية ... لكنها ماقدرتش تصبر على سحرو الغريب ... هدئو ملامحها بعد ثواني وحركت شفايفها ببطئ تناغما مع قبلاتو وفاش لاحظ جبل تجاوبها معاه كان غادي يطير بالفرحة إزدادت قبلاتو عنفا وإنتقل من شفايفها لخدها ولرقبتها وكتفها ويديه كايتحسسو كامل جسمها الفاتن وهي كاتنفس بقوة وماقادراش تسيطر على نفسها ثم رجع إلتهم شفايفها بعنف من جديد...
لكن قلب روعة كان كاينبهها أن هادشي لي كايوقاع ماشي مزيان ...و للحظة كانت غادي تستسلم بين يديه كثر وكثر حتى أنفاسها مابقاتش قادرا تسيطر عليهوم لكنها راجعت نفسها و حاولت تبعدو عليها بكل قوتها و ماقدرتش حيت كان مزير عليها بيديه وماباغيش يطلقها فمكانش عندها شي حل أخر ...
عضاتو من شفايفو بقوة حتى حست بطعم الدم ديالو داخل فمها حتى غوت جبل بألم وبعد عليها وهو كايشوف فيها وماقادرش يصدق هاد الحمقة الغبية لي عضاتو .
تخلعت روعة ملي شافت الدم نازل ليه من شفايفو وزيرت راسها مع السيارة وهي كاتنفس بقوة وكاتشوف فيه بخوف .
مد جبل يديه وتحسس شفايفو لكن فاش شاف فيديه ولقا قطرات ديال الدم ضحك بإستهزاء وقال :
- هه ....عضيتيني ... واش من نيتك!!
بدا كايقرب منها من جديد فتراجعت هي للخلف وبدات كاتسلل مع جنب السيارة باش تهرب منو وهي كاتقول :
- رراه ... راه نتا لي...
لكنه قاطعها وقال بصوتو الرجولي الغاضب :
- بشحال ثمنك؟؟ .... هااااه مستعد ندفع لي بغيتي .
توسعو عيون روعة بصدمة وبقوة الغضب لي شعرت بيه قربت منو وجمعات معاه بسقلة حتى ضار وجهو للجهة الثانية وغوتت:
- بزااااااف عليك اشماتا ...انا مكانتباعش ... قولي نتا بشحال ثمنك وانا مستعدة ندفع لي بغيتي
ماكانتش تقدر تلومو واخا قال ديك الهضرة حيت لغلطة ديالها لي خلاتو يتمادا ويقرب منها ... لكنه شيطان كايخلي كل حواسها تتوقف لدرجة مكاتبقاش تفرق بين الصح والغلط ... وهو كايبقا رجل إلى فتحت ليه الباب غادي يدخل بدون تردد
حيد جبل يديه على مكان الصفعة و بدا كايموووت بالضحك على الشئ لي قالتو وقال بسخرية :
-هاهاها ...ولايني نتي راكي واحد لمسطيا !! باغيا تشريني !!! .. خوديني فااابور ماتعطيني حتى ريال.
لكن قاطعهوم صوت أربع رجال غلاض ومكلضمين إسبانيين وهوما جاين من بعيد وكايقربو منهوم وكايضحكو وبين يديهوم قراعي ديال شراب وباينا فيهوم سكرانين لأن المشية ديالهوم ماموزوناش وكايتمايلو فكل قنت .
شافهوم واحد من الرجال الأربعة وقال باش ينتابهو رجال لي معاه :
- اووووه ... اوووووه ... ها واحد لغزالة كاتسنانا أدراري..
حست روعة بالدوخة بقوة الخوف لي شعرت بيه .. فالأول كان غير جبل ودابا تزادو ربعة وحداخرين يعني خمسة بيهوم عليها هيا بوحدها وفوق هادشي كامل كولهوم سكرانيين ...
بدات كاتقلب ودور بعينيها على شي طريق باش تخرج راسها من هاد الورطة قبل مايقاطع تفكيرها صوت واحد منهوم وهو كايقول :
- لحوووب ...كاتسنايني ... ماغاديش نخليك تتسناي ...نجي ولا تجي ... هاااه اشنو قلتي الغزالة ؟؟...
______________
نهاية الفصل