لحوووب ...كاتسنايني ... ماغاديش نخليك تتسناي ...نجي ولا تجي ... هاااه اشنو قلتي الغزالة
رجف قلب روعة وضارت شافت فجبل بخوف لكنها تصدمات فاش لقاتو متكي على السيارة ومربع يديه ومعلي رجل فالسيارة وعلى وجهو اكبر إبتسامه فاتنة.
بغات تقتلو فديك اللحضة ... اللعين اش مازال غايجيوها من مصائب من وراء راسو وفوق هادشي كامل كايضحاااك ...
ضارت وشافت فدوك سكايريا وتنهدت بتعب وقالت...
-بلاتي واحد الدقيقة
ثم حنات للأرض فكات حزام الطالون من رجليها بجوج وهزاتو فيديها تحسبا لأي أمر طارئ ،.. بعدا على الأقل تقدر تهرب بلا مايعدبها ولا يضبرها فرجليها ...
قرب منها واحد منهوم لي كان زعر وقال بصوتو لغليض :
-حبيبة ... اش بانليك نبرعك ليوم
شعرت روعة بالقرف من ديك الكلمة ديال حبيبة لي خرجت من فمو لمخزز و تراجعت للخلف وهي كاتمتمت بين أسنانها :
-حباتك حبوبة فمؤخرتك انشاء الله .
وكملت بلغوات :
- حيد من قدامي ولا غانجمع معاك بشي تسرفيقا لكمارتك حتى دور
توسعو عيون الرجل بغضب فاش بداو صحابو كايموتو عليه بالضحك والغريب فالأمر أن حتى جبل بدا كايضحك بأعلى صوتو وهو شاد فكرشو ....
شافت فيه بصدمة مامتيقاش أنه كايضحك ... لعناتو مليون مرة فخاطرها ولعنات لي ختارع هاد الشراب لي كايطير عقول الناس ومكايخلي فرق بينهوم وبين الحيوانات .. كايطير داك شويا ديال لعقل وكاتبقى غير الكسدة كاتمايل من قنت لقنت بحال الكيس الفارغ .
قرب منها الرجل الثاني وهو دافع كرشو الكبيرة للقدام تخيلت لو انه شدها بدوك اليدين ديال البوكس لي عندو ... ماغادي يخلي فيها حتى شي عضم صحيح ..
شافت فالجنب ديالو على شي طريق لكن كان الرجل الثاني واقف ... وعلى جنبو لاخور راجل وحداخور واقف ..وراها الجدار وفجنبها جبل ....
فكرات فكل الإحتمالات باش تقدر تهرب بلا ماتضطر تتقاتل معاهوم لكن حتى شي طريق مابانت ليها تسلك ..
بقات حايرا ... اشنو غادي دير؟؟ وهاد ناس ماناوينش على الخير ونظراتهوم ليها شهوانية و حيوانية ... لذالك فكرت تطبقة داك المثل لي كايقول ... "دابزو يا الفيران على خميرة الجيران"
خدات نفس وزعمت على الامر لي نواتو ... لاحت طالونها على الأرض وقربت من الرجل بوكرش وهي كاتمايل وكاتعض على شفايفها بدلع ...غمزاتو حتى قربت منو ثم مدت صبعها السبابة وتحسست لحيتو الزعرة وقالت :
- يا ويييل ويييلي أنا على الأشقر .
توسعو عيون جبل بصدمة وتسمع صوت إندهاش الرجال لوخرين وكملت روعة بدلع :
- صراحة عجبتيني ...
هزت يديها و ضربت على الكرش ديالو لكبيرة عدت ضربات وكملت وهي كاتغمزو :
- وهاد الطحشة هي سبابي فعدابي .
تحل السيد وطاح على جناب لوصالي وقرب منها باش يبوسها لكنها رجعت للخلف بسرعة وتصنعت الزعل وقالت بصوت بنت فعمرها 5 سنين :
- حبيبي ... صاحبك غمزني .
توسعو عيون الرجل وقال بغضب :
- شكون فيهوم ؟
دلات شنيفاتها بدلع وقالت بصوت مايع وهي كاتشير للرجل الضخم لي شعرو كحل :
- هذا احبيبي هو لي غمزني
توسعو عيون الرجل بصدمة وقال وهو كايتمايل بثمالة:
-أنا ابنت ال...
كحالت الدنيا فعينين الرجل الزعر وضار عند صاحبو لي سبها وهز يديه حتى هزها ونزل عليه بالقرعة ديال شراب لراس حتى تشقفات وطاح الرجل فالأرض غارق فدمو و مغمى عليه فغوت الرجل الزعر بغضب وقال بصوتو لغليض:
- لي غمزلي مرتي نقطعو اشمايت .
وبدا كايشتف عليه برجليه ماخلاش فيه وهو كايغوت ويسب:
- وامرتي هادي ... وااااا مرتييييي ...
ربعات روعة يديها لصدرها وضارت شافت فجبل بغضب ولقات لبلابز ديال عينيه خارجين فداك الرجل لي كايشتف على صاحبو وماقادرش يصدق انها غير بكلمة وحدا شعلات العافيا بين جوج ديال صحاب وخلات واحد يقتل الثاني بلاما يشعر .
حدرت روعة عينيها بإستياء ... من المفروض هو لي تسبب فهاد المشكل هو لي يحلو ولكن فين هو لعقل طيراتو قرعة ديال الويسكي
ضربت رجليها مع الأرض بغضب ومشات لعند الفيكتيم الثاني ولي كان واحد من الرجال واقف وكايشوف فدوك جوج لي كايتقاتلو على ودها وعينيه حوومر بالشراب ...
وقفت حداه ونغزاتو بيدها حتى إنتبه ليها فتلاح عليها بجسمو الخانز بريحة شراب وبغا يبوسها لكنها دفعاتو وقالت وهي كاتعوط فحوايجها بتقزز ....
- مالنا على هاد الزربة غير بشويا ..
ثم رجعت ضحكتليه بمياعة وقالت :
- حبيييي ... غادي ندوز انا وياك ليلة ولا في الأحلام ..
ضحك الرجل حتى ظهرت أسنانو الصفرة وريحة فمو جابتليها التقية وشدها من يديها باش يقربها منو لكن الرجل الرابع تدخل وجرها من دراعها بقوة لدرجة فاش علات راسها فيه لقات راسها كاضربليه فحزام سروالو بقوة لي طويل وغليض ... وفكرت انها صافي مشات فيها.
- اش كنتي كاتقول ليها ؟
قالها الرجل الضخم فشاف فيه صاحبو ورد عليك بغضب:
- هاديك الفاتاتش ديالي فهمتشي .... وأراها لهنا
شدها من يديها وجرها لعندو حتى ارتطمت بجسمو القوي وكمل :
- تشا سير بحالك ولا نخور ليك عينيك
مارضاش الرجل الثاني وجمع معاه براس حتى تزدح مع مؤخرة سيارة كحلة وطاح للأرض مغمى عليه... ظنت أنها صافي تهنات منهوم كاملين لكن فاش ضارت باش تهرب وهي دخل فالكرش ديال الرجل الزعر لي كان شاد فيديه الفوهو ديال القرعة دشراب لي هرسها على راس صاحبو .
إبتلعت ريقها بتوتر وخوف وطلعت عينيها بشوية من يديه لكرشو لوجهو لي كايخلع وبتاسمت بتصنع ...
قرب وجهو من وجهها وقال بصوت غليض :
-حُوبــــــي
كانت باغيا تقيا حست بالمعدة ديالها تقلبات بقوت لي ريحة فمو خانزا ... تراجعت للخف بضع خطوات وهي كاضحك بخوف وتقول :
-نتا .... نتا ....رااااااجل وسييييييد رجال ...
لكن قبل ماتكمل كلامها دخلت فجسم اخر ، ضارت غير بشوية وهي تلقا داك العملاق كايبتاسم ليها ... ضحكت بقلة حيلة ومدت صبعها السبابة ونغزات كرشو وهي كاتقول بين سنانها و كاترجف ..
-ونتااااا .... نتا رااااجل أنا لي بنت لحرااام مقطعة ...
بدات كاتبكي بحال شي بنت صغيرة بالصوت وتضرب برجليها فالأرض وكاتغوت :
- الله ياسيدي ياربي اش درت انا فملك الله ... الله ياخد فيك الحق الباروووون الله ياخد فيك الحاااااق .
شاف فيها جبل بهدوء وشير لنفسو بصبعو السبابة وقال :
- انا ؟؟؟...
بغات تقتلو فديك اللحظة بغات تعضو بغات تعصرو وتخرج منو الزيت وعضامو تدفنهوم تحت الشجر باش على الأقل يتسما دار شي حاجة مفيدة فحياتو من غير المصائب ...
شافت فيه بغضب وغوتات:
-دعيتك لله يا لكافر بالله ... ونتا قديم وحافي بحال موس الحجام ماتنفع ماضر ياشماتة .
بقا جبل كايشوف فيها بغباء لكن فواحد اللحظة تقلبت معدتو فبسرعة تحنا للأرض وبدا كايتقيا فالأرض فجنب السيارة وهادشي غير ماخلاها تتعصب كثرر لكن غادي يدفع الثمن غالي على هادشي لي دار فيها .
قربت من الرجل العملاق وعلات راسها شافت فوجهو وقالت وهي كاتصنع الإبتسامة :
-سيدي ومولاي اش سماك الله .؟؟
حل الرجل العملاق عينيه بسيف وقال وهو كايحاول يوازن وقفتو :
- ســـام ..
توسعو عينيها بصدمة من الإسم ديالو ... سام!! ... هو لا علاقة مع الإسم ديالو لي يجي مع طفل او شاب مراهق ماشي مع عمود إنارة ... تنحنحت بتوتر وقالت :
- خويا سام ... نتا راه مرضي لواليدين حيت ربي لاحك فطريقي وباينا عليك قلبك بيض ونيتك مزيانة هذا علاش بغيت نطلبك واحد طليبة الله يرحم بيها لواليدين ...
ضحك سام بصوت غليض وقال :
-طلبي ألحوووب
تقززت منو وتمتمت بين سنانها:
-الله يعطيك حبوبة فلسانك ... الله يعطيك الجربة وقلت الضفران ...
دارت راسها كاتبكي بلعاني وبدات كاتعري فيديها وتقول:
- شوف ...شوف اسيدي هانتا شوف هداك ولد لحرام شكايدير فيا بالضرب هانتا راه معيشني فالذل والتبهديلة .
توسعو عيون سام وغوت بغضب :
- شكون هاذا لي ضربلي لحوووب ... هاد الفاتاتش ديالي وابربي حتى نشروط بنادم أنايا
ضحكت روعة بخبث وداكشي لي بغاتو وصلاتلو ... قربت منو وهي كاتمسكن وقالت وهي كاتشير بيديها لجبل وتبكي بلعاني :
- هاذاك الكافر بالله لي مور الطوموبيل.. شفتيه كيف خايف منك ومخبع ... ولد لحرام والدا معاه سبعة ديال لكروش وطيحت خمسة ... خمسة ديال لولاد كولهوم طاحولي بسبابو ... كايهلكني عصا كل نهار ... انا بغيتك نتا تكون راجلي .
ضيق سام عينيه فجبل لي كان كايتقيا مور السيارة وغوت :
-وابررررربي حتى يموت الليلة ..
تخلعات روعة وقالت بسرعة:
- الا لا لا ... ودوك سبعة لوخرين بغيتي تخليهوم لي يتاما ... ارا بعدا هاد القرعة من يديك .
حيدت ليه القرعة ديال شراب من يديه وقالت :
- بغيتك غير تعطيه شي طريحة ديال لعصا صاااافي .
غمزها سام وقال:
- من عينيا الحوووب ...
- ماااازيان الله يرضي عليك ازماني
حرك سام رجليه ومشا قاصد جبل لكن المشكل أنه كان كايشوف منو جوج وثلاثة ... فبلاصت مايمشي لجبل دخل فالحيط وبدا كايقلب على الطريق لي تسلكو باش يوصل ليه ...
تنهدت روعة بغيظ من غباء سام وقالت بين سنانها :
- ياويلي ياويلي ياويلي نندب حناااكي أنا ... ياربي أش هاد زهر لي عندك الشيطان السوري .
بقات عندها فرصة وحدا .... بسرعة ضارت روعة عند الرجل الزعر بو كرش وقربت منو وقالت وهي كاتبتاسم بتصنع :
- إيوا شفتي ... هاحنا تهنينا منهوم كاملين ... بقينا غير انا وياك .
ضحك الرجل زعر وبغا يعنقها لكنها بسرعة بعدت عليه وقالت :
- بلاتي ... بلاتي ... اش سماك الله اسيدي .
شاف فيها الرجل زعر وقال ببساطة :
- لــوي
شافت فيه روعة بإستخفاف على سخافة اسمو ... الأول سام وهذا لوي ... اش هاد سميات ديال كيليميني ؟؟!.. تنهدت وقالت :
- طحتي من عيني ... موهيم ماعليش غانسميك بوشعيب ....
قربت منو وهي كاتشوف فسام لي كان مازال كايقلب على طريقو ثم شافت فجبل لي جبد كلينكس من جيبو وكايمسح فمو وتمتمت بخبث:
- غير لي مخبي شي طرشة مخبيها لحنكو والله مايسلك منها دابا ... صافي مشا فيها ... اليوم يتشتتو ليه سنانو باش يتعلم كيفاش يتجرأ ويبوسني
علات راسها فلوي وقالت وهي كاتشير بيديها لجبل :
- من صبح وداك شلاهبي كايضور بيا باغي يديني معاه بسيف ... انا قلتليه بلي بوشعيب ولي هو نتا هو زماني وحبيبي وراجلي وقرت عينيني وبلي نتا لي غانمشي معاك ... ولكن هو اش دار قالك إلى كنتي الوي راجل ديني صحة ... و أنا مالقيت مانقول وقلت نمشي معاه ولكن كلمتك هي الولة .
شاف لوي بغضب فجبل وقال:
- مرتي اااانا ... يديها هاداااك ...أنا راني قتلت على ودك صاحبي وعشرت سنين وسطحتو فالأرض .
ضارت روعة وشافت فصاحبو لي كان غارق فدماياتو فالأرض و إبتلعت ريقها بخوف من شراسة لوي وندمات كاع لاش هضرات ... خافت بزاف لايدير نفس الشئ لجبل بالخصوص فاش شافت فيديه راس القرعة لمهرسة ..
بسرعة طارت ليه على يديه وزولتها ليه ولاحتها بعيد وتراجعت على فكرة الإنتقام من جبل ...
-عرفتي نقولك ... صافي بلاش.
لكن الموصيبة كان مصر دفع روعة حتى كانت غاطيح ومشا كايجري عند جبل شنق عليه وغوت فوجهو...
-أجي نتا ... باغي تديلي مرتي اولد لـ....
فالأول جبل ماعرف راسو باش تبلا لكن فاش إستوعب الأمر حنا راسو ببطئ وشاف فيد لوي لي كانت شانقا عليه وفلمحة بصر خرج مسدسو من خلف خصرو وفديك اللحظة غوتت روعة بقوة الخلعة قبل مايطلق جبل جوج رصاصات على ركب لوي حتى غوت وطاح على ركابيه للأرض ورجع جبل شد فيد لوي لي كانت شانقا عليه ولواها حتى غوت وتسمعو صوت تكسير ديال صبعانو ...
كان لوي كايغوت من شدة الألم بسبب صبعانو لي تهرسو والرصاصات بجوج لي صابو يجليه وروعة حتى هي كاتغوت بالخلعة ... لكن غضب جبل كان فوق ألم لوي فغوت بغضب وقال :
- تجرأتي تحط يديك عليا ياولد لـ... واش ماعارفش شكون أنا ..
تعصبات حتى روعة من طريقة تصرف جبل الهمجية مكانش عليه يدخل المسدس فقتال حر ونسات انها خدات دور الشيطان فالوسوسة بيناتهوم حتى كانت غاتسبب فموت الرجل على يدين جبل فغوتت بغضب وقالت :
- شكون نتا كاااع فملك الله .... اللحية راها تما ولكن بقات فالهمة اما اللحية تلقاها حتى عند العتروس .
شاف فيها جبل بغضب وقال :
- نتي مولات هاد طنوعيرا اشيطانا
طلق من يد لوي لي طاح على الارض كايغوت بألم وقرب من روعة وهو كايقول بين سنانو :
- نتي لي حرشتيه عليا أجنية .
خافت روعة من نبرت صوتو الشيطانية وتراجعت للخلف بضعة خطوات وهي كاتمتم بين شفايفها بتوتر وكاترجع بالخلف :
- ااايواااا .... بزاااااف عليك .... انا انسية بنت بنادم ولدتني مي من كرشها على تسعة شهور وبا دبح عليا بقرة وخمسة دلعجول .
ضحك جبل بسخرية على سخافتها ثم قال بين سنانو وهو كايقرب منها بغضب :
-اقليلت لحيا بلا حشما بلا حيا كاتعلي صوتك عليا وزايداها بتخراج العينين . عطيتك قيمة وبغيتي طلعيلي فوق راسي .
ردت عليه بسخرية وهي كاتمتم وتتراجع للخلف بخوف :
- إنتا معلم وإحنا منك نتعلم
شاف فيها جبل بإستخفاف من التخربيق لي قالت ...راه بسييف ماعرفت ماتقول كانت كاتقلب غير على شي طريق باش تسلك راسها من هاد الإعصار لي جاي مستقصدها لكن فواحد اللحظة جبل مابقاش قادر يصبر مشا كايجري لعندها وغير شافتو وهي تطلق رجليها لي كانو حفيانين للريح وبدات كاتسبك وتجري فلباركينك بحال شي وحدا هاربا من الحبس .
- اجي غير نهضر معاك .
غوت بيها جبل بغضب وهو كايجري موراها لكن روعة غوتت وقالت بغيظ :
- هاهاوااااات عليك ..
تخبات مور واحد السيارة بيضة وغبرات مابقاتش كاتبان ليه وبغا جبل يتسطا داك ساع وهو كايضور بعينيه بحال شي واحد تالف فغوت بغضب باش تسمعو :
- فينك البخوشا مولات اللسان سليط ... كاتحسابي راسك جوهارو معلقة فالحيط .
عضت روعة على شفايفها وبغات تقتلو لكن ماقداتش تصبر وردت عليه بلغوات :
- أنا بعدا جوهارة بقات فيك نتا داير بحال بلعمان غير لحموريا وقلت الريحان .
إبتسم جبل بخبث فاش شاف الظل ديالها مور الطوموبيل وقال باش يسايرها علاما يوصل ليها :
- ماجاتش بالنهود وحموريت لخدود ... بقات فلعقل ونتي ماتكسابي منو حتى غرام .
ضحكت روعة بسخرية وقالت :
- هاهاها ... ماضحكنيش عافاك ... على الأقل أنا عقلي مازال فبلاصتو ماشي بحالك لي طيرتيه بجوج كيسان ديال شراب البزناز .... عرفتي نتا داير بحال البقرة لمجرابا لي حلبوه منها يدهنوه ليها مامنك حتى فايدا من غير المشاكل ولـ...
قبل ماتكملها لقات راسها طايرا فالسماء وفوق كتافو .. كيف دار حتى هزها مانعرف ... بقوت الصدمة ماستوعباتش انها فوق كتافو حتى ضربها بيديه لمؤخرتها وحست بالألم عاد غوتات وبدات كاضربو على ضهرو باش يحطها ...
- حطنيييييي .... واحطنييييي ولا غانجمع عليك أمة لا إله إلا الله ونشوهك السكايري ...
قلب جبل عينيه بغيظ وقال :
-حنا فبلاد الكفار واش نسيتي أمة لا إله إلا الله خليتيها فبلادك ...
بقات روعة كاتغوت وضربو لضهرو بيديها لكن فاش لمح طارو ديال الزبل لكبير لمعت فبالو فكرة ... مشا كايجري بيها على كتافو وقلبها فيه بحال شي شوال ديال لبطاطة ونفض يديه وخلاها كاتغوت وتسب .. عطاها بضهر ومشا بحالو وهو كايقول :
- هاديك هي بلاصتك .
ناضت روعة بسرعة الغضب وغوتت وهي كاتزول لوسخ وزبل من شعرها وحوايجها وتسب :
-بغيتلك ضرببببة.... إلا ماجاتك تجيك فكفاك ...تجيك فكفااااااگ وفوجهك ... ااااااه يعطيك موضيبة يا شماتة ...
علات رجليها باش تخرج من الطارو ديال الزبل لكن فاش ماقداتش غوتت بغضب وضربت الطارو بيديها وقالت :
- عطاتك ليااااام البزناز ... البيض لماليه والزق لمول دجاج ...خخخخ تفووو لقيتني مالقدرتش نطلع اما كون حسنت ليك بلا ما أشماتة
إستفزاتو ديك الكلمة ديال " شماتة " لي قالتها هاد نهار كثر ملي ذكرت سميتو فرجع لعندها وهو كايجري وغير شافتو غوتات بقوت الخلعة وبدات كاتعلي فرجليها باش تطلع حتى غلب وزنها على الطارو وتقلب بيها على الأرض وجات مزلعا هي وزبل لكن بقوة الخلعة مكانش عندها الوقت باش تغوت ولا تتألم جمعات رجليها لحفيانين بسرعة وطلقاتها للريح وهي كاتغوت :
-واااااامييييي
لكن لسوء حظها لحق عليها جبل بسرعة وجرها من شعرها حيت داكشي لي لحقاتو يديه قبل مايلحق درعانها بجوج وشدها منهوم وتم جارها وهي كاتغوت بحال شي معزة
-ااااااه طلللللللللللاق مني أشمااااتة
- أنا شماتة .... انا نوريك هاد شماتة شغايدير فيك البرهوشة ...
بدات كاتغوت وهو جارها من يديها حتى وصلها لسيارتو وحل الكوفر ولاحها فيه وسد الباب عاد تنهد ورتاح حتى إختفى صوتها وبقا غير صوت الضربات حيت كانت كاتحاول تحل الباب وكاتغوت .
ركب فسيارتو وهو كايضرب فراسو بيديه باش يفيق نفسو ويتوكد ... ندم كاع لاش شرب ديك القرعة ... كسيرا بسرعة وخرج من باركينج ديال الهوتيل وهو كايفك لكرافاطا من عنقو وكايسب فروعة لي كانت مازالة كاتغوت وكاضرب فالكوفر بيديها .
-واسكتينيااااا يقطعليك الحس
غوت بيها جبل بغضب لكن فاش ماسكتاتش مد يديه وشعل الراديو وجهد ليه حتى لأخر درجة باش يختفي صوت غواتها المزعج وداكشي لي كان ....
مرت عدة دقائق وحس روعة تقطع لكن جبل بقوة الدوخة لي كان كايشعر بيها والخنقة نسا اصلا وجودها حتى ضربتليه فبالو فجأة فمد يديه وطفا الراديو وطلق ودنيه باش يسمع شي صوت منها لكن والو من غير صوت محرك السيارتو مكان حتى شي صوت .
بسرعة ركن السيارة فجنب الطريق وخرج كايجري حل باب الكوفر وطل عليها وهو يتفاجئ بالإعصار ديال التقية لي ضرب فوجهو ...
حس بالشمتة وبغا يقتلها لكن منظرها المريض خلاه يتاقي شرو فيها ... بقا حاني بنفس الوضعية ومد يديه جبد زيف من جيبو ومسح وجهو بتقزز ...وقال :
-الله يعطيك موصيبة الويلة .
ردت عليه بصوت مريض:
-تصيبك ...تصيبك ... يصيييبك فالقلب إنشاء الله
مدت روعة رجليها للأرض ونقزات من الكوفر وهي دايرا يديها على معدتها وكاتقيا حتى خوات الفروج لي تغدات بيه فالأرض وهي كاتسب وتلعن فيه ... لكن فواحد اللحظة هزت راسها وهو يبان ليها محل ديال لحوايح مغلق لكن الباب ديالو من الجاج وفنفس اللحظة شافت دورية الشرطة الليلية جايا من بعيد ...
الشمتة لي كاتحس بيها بوحدها ومابغاتش تبرد ليها ... هو راه لاحها فطارو ديال زبل وسط لعفن وفوق هادشي كامل سد عليها فلكوفر بحال شي خروف ديال العيد ناقص غير يربط ليها ليدين مع الرجلين ...
مالت براسها وهي تشوف يافطة ديال لحديد صغيرة مكتوب عليها إعلان ديال شي دكتور او محامي ماقدراتش تشوفو مزيان حيت ماشي هذاك هو همها ...
هزت راسها فجبل ولقاتو كايسب بين سنانو بصوت خافت وكايمسح التقية من وجهو وحوايجو ورجعت شافت فاليافطة و فالدورية ديال الشرطة لي جايا من بعيد ..
-غادي تنـــدم
تمتمت بيها و بسرعة مشات كاتجري هزات اليافطة من الأرض ولاحتها على الزجاج ديال المحل حتى تشقف وتطلق الإنذار بأعلى صوت وطلقت حتى هي رجليها لحفيانين وهربات مخليا موراها جبل مافاهم والو لكن فاش سمع صفارة سيارة الشرطة ماعرفش راسو باش تبلى شاف فيها كااجري بحال عويطا وسيارة الشرطة جايا من بعيد طالقة إنذارها والإنذار ديال المحل لي هرسات روعة الزاج ديالو وتخلطو عليه الأصوات فقرر يطبق مثل "دير مدار جارك ولا حول باب دارك "
طلق رجليه حتى هو وبدا كايجري وبقوة الدهشة نسا أنه كان بإمكانو يركب فسيارتو ويهرب وفكر انه حتى الى رجع غادي يشدوه البوليس ... وبدا كايجري
- روووووووووووووعة .... غادي نقــــــتـــــلاااااااااااااااك
غوت بيها جبل ولكن فيييين هي روعة سبقاااااتو بسنوات ضوئية .... دخلات من واحد الدرب باش تخبع لكنه تبعها وغير لقات بليصة مأمنة تحشات فيها بجسمها الصغير وهي كاتمتم بخيث:
- وشوف دابا كيفاش غادي تفك راسك من هاد الموصيبة البزناز .هيهيهيهي
ضحكت روعة وسدات فمها باش مايسمعهاش حتى كاتفاجئ بيه تحشا معاها وزاحمها فلبلاصة لي فالأصل كانو كراطن كبار محطوطين على بعضياتهوم ...
حلت فمها باش تغوت وهو يسبقا سد ليها فمها وتمتم بين سنانو :
- تغوتي نجبدليك لسانك من حليقك ونقطعو ونقليه فالزيت وناكلو
شعرت روعة بالقلب ديالها كايضرب بقوة الخوف منو وهزت راسها بمعنى "واخا صافي" باش يطلق منها ... وهي متأكدة أنها جابت أخرتها واليوم غادي تموت على يديه مافيهاش الشك.
شاف ليها فعييها وقال بغضب :
- علاش هرستي باب المحل ...
طلع ليها قلبها بسبب ريحة الشراب لي خرجت من فمو فقالت بتقزز :
- يييع ... ريحة فمك كاتقطع النفس تقول شربتي برميل ديال الشراب ..
توسعو عينين جبل بدهشة ومارضااااش... هذاك الشاب الأنيق العتيق العفيف المنمق ملمط تعيفو بنت بحالهااا... هاه هادشي لي بقا!! ... نفخ نفسو فيديه وشم ريحة فمو وبغا يتقيا حتى هو لكنه تظاهر بالعكس وقال بغيظ:
-كون شفتي ريحة التقيا لي فمك تعاودي تقياي من جديد... تقول سارطا طوبا
مارضاااتش لاش يعيفها وهي ديك البنت اللبقة الأنيقة العفيفة الشريفة الشفيفة فحلت فمها و نفختليه فوجهو بتحدي وهي كاتقول :
- ححححححححح ... شمها شمها مزيييااااان ححححح
لا ملي القضية ولاا فيها تحدي هو مستحيل يخسر ... حل فمو وبدا ينفخ ليها فوجهها وهي تنفخ وهو ينفخ هي تنفخ وهو ينفخ ...
جبل - حححححح
روعة - ححححححححح
جبل - ححححححححححح
روعة - حححححححححححح
جبل - حححححححححححححح
روعة - حححححححححححححححح
جبل -ححححححححححححححححححححححح
الشرطة - هزو يديكوم لفوووق
قاطعهوم صوت الشرطي لي كان هاز المسدس بين يديه وكايشوف فيهوم بغضب وحذر .فتمتم جبل بين سناتو وقال بغيظ
- ايوا شفتي دابا أسفريطا شنو درتي
ردت عليه روعة بتحدي:
-إيوا فكها يا من وحلتيها اسي لبارووون باش لمرة جايا تمد يديك عليا نقسمهوم ليك .. يحسابلك راني ساهلا ليك .
بغا يقتلها على ديك الهضرة ..هي كحلتها ولسقتها فيه ودابا كاتجبد عليه ...
-واخا غير بلاتي عليك ... أنا هو الكابوس الأسود لي غاتعيشيه من هنا لفوق اجنية .
حلت فمها باش ترد عليه وهو يغوت الشرطي وضرب دوك لكراطن حتا طاعو وقال :
-هزو يديكوم وخرجو من تما ماتخليونيش نستعمل معاكوم العنف .
هز جبل يديه بإستسلام حرك رجليه خلف على كارطونة وقال البوليسي بصراخ:
-شنو كنتو كاديرو تما بجوج ..؟؟ وشنو دوك الأصوات
شاف جبل فروعة بغيظ ثم شاف فالشرطي وقال :
-اوالو اشاف ... راه غير كنت كانعلمها كيفاش تزند الفاخر ديال العيد لكبير .
عقد الشرطي حواجبو بإستفهام وتجاهل السخافة لي قال فاش لحق عليه الزميل ديالو وهو كايقول :
-ولاد لحرام هادو هوما لي هرسو الباب لداك المحل وبغاو يسرقوه .
شاف فيهوم الشرطي بغضب لكن جبل وروعة كانو كايشوفو فيهوم بنظرات منتهى الرقة والبرائة ... واخا الروايح ديالهوم كانت كاتعطعط ومخلطة بين شراب والتقية لكن منظرهوم كان ملائكي سبحان الله يخلق ما يشاء .
عقد الشرطي حواجبو بتفكير وهو كايشوف فرعة ثم قال :
-شحال من مرة غادي نقول بلي هاد سيكتور ممنوع على العاهرات واش ماقالهالكش الباطرون ديالك
توسعو عيون روعة بصدمة وغوتت حيت مارضاتش:
-بزاااااف عليييد ... أنا مكانبيعش لحمي أشارف .
تعصب الشرطي وهو يجرها من دراعها وزيرها مع الطوموبيل لي كان الضوء ديالها كايسني ودار ليها المينوط فيديها خلف ضهرها ...لكن فاش قربو من جبل باش يمينطوه وهو يبدا يغوت ويسب فيهوم
-أنا ماهرست حتى حاجة أولاد لـ.. ديك الجنية هي لي هرسات جاج وهربات
لكن الشرطي قاطعو وهو كايقول بصراخ :
- هاد الهضرة حتى توصل للمخفر وعاد قولها ...
وضربو للخويا ديال رجليه باش قدر أخيرا يطيح جبل للأرض ودارليه المينوط فيديه خلف ضهرو وعاد جرو باش يدخلو للسيارة فالمقعد الخلفي جنب روعة لي بتاسمت بهدوء غير شافتو وقالت :
- مرحبا بيك على متن الرحلة الذاهبة إلى السجن جبولتي.
بغا يقتلها ولو ماكانوش يديه مربوطين خلف ضهرو كون ريشها من داك شعر لي تنفخ وطلع للسماء .. بإختصار كان منظرهوم داير بحال "ديانا ومارتن" في الرسوم ديال مغامرات مارتن في عالم الأساطير ناقصهوم غير دجاڤا ويكملو المجموعة المجنونة .
أخيرا وصلو لمخفر الشرطة وخرجوهوم من السيارة ... روعة كانت مطيعة وكاتمشى عادي واخا الشرطي شاد فيها لكن جبل شدها معاهوم زكارا ... حلف مايتحرك ولو مادفعوهش مايتحركش ولو خطوة ... وبين الخطوة والخطوة كايوقف حتى يرجعو يدفعوه من جديد بحال شي كروسة ...
غوت الشرطي بغضب وهو كايدفع فجبل بطريقة خلات روعة تمووت بالضحك وقالت بسخرية :
-ماتديوش عليه راه غابوهالي
شاف فيها جبل بغضب وبغا ينقض عليها لكن الشرطي سبقو ودفعو داخل الزنزانة ودخلوها حتى هي للزنزانة ديالها وماكان فارقهوم غير قضبان ديال الحديد ..
فك الشرطي الأصفاد من يد روعة وبدات كاتدلك معصميها بألم وجا الشرطي الثاني باش يفك أصفاد
فك الشرطي الأصفاد من يد روعة وبدات كاتدلك معصميها بألم وجا الشرطي الثاني باش يفك أصفاد جبل وهو يغوت فوجهو بغضب :
- ماتقيسش فيا ... ماتقييييسش واش ماعارفش شكون إنا !!...
قلبت روعة عينيها بملل على غرور هاد الرجل لي ماعندو لا حد ولا نهاية وتمتمت بغيظ:
- اووه ماتقيسوش فشيكسبير السوري
شاف فيها جبل بغضب وتوعدها بالإنتقام عير بعينيه ورجع غوت فوجه الشرطي لي كايفك ليه الأصفاد من يديه :
-واش عارف الثمن ديال هاد لحوايج لي لابسهوم أنا ولي وسختيهوم بيديك لمعفنين .
رد عليه الشرطي بإستهزاء
-باينا غير من ريحتهوم غالين ..
وخرج وزدح الباب موراه وسدها مخلي موراه جبل مصدوم من صراحة الشرطي الوقح فعلى دراعو وشم تحت باطو وبغا يتقيا ... المعدة ديالو تقلبات لكنه مارضاش فاش شاف فروعة لي كاتشوف فيه بسخرية وكاتموت بالضحك وقرر ينتقم من الشرطي لي حرجو قدامها :
-شفتي نتا ... ماتسواش حتى ثمن صباطي .
حرك الشرطي راسو يمين وشمال بقلة حيلة وكلس على مكتبو وهو كايتمتم بين سنانو :
-طلعولي فراسي هاد سكايريا ديال زبل ... فينما كان شي مسوفج يطيحني فيه سيدي ربي .
ضحكت روعة بسخرية عليه فاش سمعاتو وقالت :
-كايهضر عليك أجبولتي
مارضاااش جبل وقال وهو كايشوف فيها بغيظ ...
-روعة بغيت نعلمك واحد الحاجة زوينة اليوم .
شافت فيه روعة بإستخفاف وقالت :
-اش هي بسلامة ؟؟.
إبتسم جبل بمكر وقرب من قضبان زنزانتو وقال وهو كايشير بيديه للشرطي الجالس على مكتبو :
-غادي نعلمك طريقة إطلاق البزقه على بحال هاد الأشكال .
قهقهت روعة بسخرية وقالت :
-هاهاها .... وريني نشوف
إيتسم جبل وقال :
-أولا تقومين بعملية شهيق بعمق من الأنف والبلعوم مع بعضهم البعض .
تنخم جبل حتى تنخم وكمل :
-ثانيا تخرجين البزقة إلى بيت النار ( الفم ) مع صوت اححححخق
وكمل وهو جامع البزقة ففمو :
-ثالثا تقومين بالتسديد على الوجه تماما ...
-رابعا ترجع راسك شويا لور ...
-خامسا تطلق البزقة بسرعة الضوء مع دفع الرأس باتجاه الامام مع صوت تفووو يلعن بو طواسلك يا ولد الكلبة .
بزق جبل على الشرطي بطريقة صاروخية لكن مع الأسف ماوصلاتلوش وهو أصلا كان مدرق وجهو بالجريدة ومامسوقش للعالم لي جابهوم بجوج بيهوم ... أما روعة كانت غادي تسطا بالضحك وهي شادة فكرشها والدموع نزلو من عينيها وبدات كاتمسحهوم وتقول :
-هاهاهاهاهاهاها .... ينعل بات بات بات بات شياطينك اجبل هاهاها ..
لكن فاش مسحت دموعها وحلات عينيها لقات جبل طايح على الأرض بحال شي جثة تخلعات فالأول ومشات كاتجري شدات فالقضبان لي فارقينهوم وناداتو باش يسمعها :
- جبل .. جبل واش نتا بيخير ؟ ... جبل ..
فاش ماجاوبهاش تخلعات وبدات كاتعيط للشرطي باش يشوف مالو لكن الشرطي ماداهاش فالعام لي جابها لكن فجأة بدات كاتسمع صوت الشخير ديالو عاد رتاحت وكلسات على الأرض بتعب وهي كاتشوف فيه بصمت ...
ملامحو كانت هادئة ومافيها حتى تعبير يثير القلق ... كانت مجرد ملامح هادئة محفورة بحدة بينما خصلات شعره الأسود المائل للبني متناثرة على جبينو .
إبتسمت بهدوء ثم إستلقت على الأرض وإنكمشت على نفسها ... حطت يدها سندت بيها راسها وسرحت فداك الجسم الضخم المستلقي أمامها بهدوء لكن فاش تفكرت طريقتو فتقيبل شفايفها حاولت تكبت الإبتسامة لي بغات تظهر بيديها ...
تفكرت كاع المصائب لي دوزو اليوم وشجارهوم وقتالهوم وكأنهم أطفال العشر سنين تجردو من كل صفات الرشد والرزانة وخلاو الأطفال لي داخلهوم تتصرف بعفوية .. ماقدراتش تكبت إبتسامتها وماقدراتش تمنع قلبها ينبض بقوة وهي كاتشوف فيه فمكانش عندها شي حل باش تكبت هاد المسئلة من غير أنها تعطيه بالضهر وتغمض عينيها وتنعس حتى هي بحالو .
مرو الساعات والدقائق بسرعة وهوما ناعسين حتى أشرقت شمس يوم جديد فتح جبل عينيه على إثر خيوط الشمس لي تسللت من نافدة الزنزانة ... مرر أصابعو حول خصلات شعرو البني وهو كايحس بالألم كايقطع فراسو وخدا بضع ثواني غير باش يستوعب المكان لي حل عينيه فيه لكن فاش لمح جسم روعة لي كانت ناعسا على الأرض بهدوء توسعو عينيه بصدمة وتسائل على سبب وجودو معاها فهاد الزنزانات ..
قرب لعندها ببطئ ثم مد يديه ولمس خصلات من شعرها الأحمر بهدوء و مرر أنامله على خدها وهو كايبتاسم الى أن وصل لشفايفها ومرر أصبعو الإبهام عليهوم ومسح بقايا الكلوس وهمس بلاما يشعر بصوت مبحوح :
-ياروح وعمر البارون
إنتبه أخيرا للشئ لي قال بلاميشعر ثم علا راسو شاف حول الزنزانة بقلق وكان مكتب الشرطي فارغ ورجع شاف فجسم روعة بهيام وهمس بعد صمت وهو كايبتاسم بهدوء و كايدقق فتفاصيل وجهها الهادئة :
- ياروحي ...ناعسا بحال الملاك ... ونتي إبليس يخاف منك .
إبتسم بهدوء وناداها.
- روعة .... روعة ... نجيبلك لفطور .
تململت روعة فمكانها لكنها مافاقتش ورجعت نعست ... سرح جبل في تأملها وإبتسم بهدوء وهمس :
- ياويل قلبي عليكي ياروعة ... ياويييلو
وكمل بصراخ باش يخلعها علا الله تفيق :
-رووووووعة وااا العوجااا
قفزت روعة من مكانها وغوتت :
- والله ما أنا اشاف هو .
لكن فاش لقات الصمت إعتدلت فجلستها وهي كاتشوف حولها بإستهجان ... علات عينيها وغير شافت جبل وهي تقلب عينيها بضجر وتمتمت بغيظ :
- هاكا كايفيقو الناس بفلادكوم .
إبتسم جبل بهدوء حتى برزت غمازة دقنو الصغيرة وقال :
- لا ... ولكن نتي حالة خاصة ....
وكمل وهو كايقول :
-يبدو انني ثقلت بالشرب حتى مابقيت عاقل على والو .. اشنو لي وقاع لبارح حتى وصلنا لهنا ؟
توسعو عينين روعة بصدمة وقال :
-مابقيتي عاقل على والو ؟؟
وكملت فنفسها .".حتى البوسة لي بستيني نسيتيها "..لكنه قال ببساطة :
-اخر حاجة عاقل عليها هي فاش كنتي كاتغني وكاتشطحي بمياعة
شافت فيه بغيظ وبغات تعطيه شي جواب لي يناسبو قال مياعة قااال ... لكنها تفكرت بلي جبل دابا رجع لوعيو وهو صاااحي وبكامل عقلو يعني ابسط كلمة غاتقولها غاتحاسب عليها وغاتعاقب ففضلت أنها تسرط لسانها وماتقول والو وحمدت الله أنه نسا كاع المصائب لي وقاعو بالأمس حيت إلا تفكرهوم غادي يجري عليها من الخدمة مافيهاش الشك وإحتمال يعدمها بالرصاص ..
لكن فاش كاتفكر اللحظة لي كان كايعلمها تبزق على البوليسي كاتغلبها الضحكة بسيف عليها .
-هاهاهاهاهاهاااا
عقد جبل حواجبو بإستهجان وقال:
-لاش كاضحكي .
جمعت روعة الضحكة وشافت فيه بتوتر وقالت:
-والو غير تفكرت واحد الولد كان كايقرا معايا .. واحد النهار علمني كيف ندير نبزق
وبدات كاتموت بالضحك لكن جبل على حاجب واحد فيها وقال بسخرية وهو كايقلب عينيه:
- هه ... تبرهيش .. بلا شك هاد لولد حمق
ضاحت روعة على الأرض وبدات كاتموت بالضحك وهي شادة فكرشها وكاتقول :
-والله ماكدبتي ... وااامي كرشيي .. باراكا عليا من الضحك غادي نسخف .
إبتسم جبل بسخرية وهو كايشوف روعة كاتمرغ فالأرض وكاضحك لكن خلاها و ناض وبدا كايغوت ويعيط لشي حد من الشرطة باش يوضح ليه شنو هي التهمة ديالو لكن ملي ماجاوبو حد بدا كايسب فيهوم حتى عيا ورجع كلس فالأرض وهو معصب
-شنو وقاع لبارح ؟؟
قالها بغضب وهو كايشوف فروعة لي إبتلعت ريقها بتوتر و رمشت بعينيها بسرعة باش تعطيه الملامح الملائكية البريئة ثم قالت:
-لبارح اولا كنتي غادي تقتل رجل ... ثانيا بغيتي تشفر محل ديال لحوايج
تصدم جبل وقال:
-أنا نشفر محل ديال الحوايج !؟
هزت روعة رأسها ببراءة وقالت :
-تماما ... عيت نرغبك باش ماتهرش زاج ديال المحل لكن نتا كنتي مُصر فاش شفتي الگارسون لي معروض للبيع وبديتي كاتحلف باش تاخدو وتلبسو ...
كرر خلفها بصدمة :
-گارسون ... اشنو كاتخربقي .
قاطعهوم دخول رافاييل وهو كايبتاسم ويتمايل بجسمو الرياضي وغير شافوه وقفو بجوج بيهوم فرحانين لعودة الحرية فقال رافاييل بسخرية :
-كايبانلي درتو شي شويا ديال لبسالة لبارح .
_________
نهاية الفصل