هوتيل سود إبيزا سويتس/الساعة 11:30 مساءً
سالات روعة الغناء فالنادي الهوتيل وكانت كاتغير حوايجها حتى دخلت عليها آي يو وهي كاتقول بحماس:
-ســـلااام المغامرة ...صافي دابا غادي نسميك "لويز بيود" على اسم اشهر مغامِرة فالعالم .
علات روعة راسها وشافت فـإنعكاس صورة آي يو فالمراية وتفكرات المغامرة المميتة لي دوزات ..قالت بسخرية وبالدارجة المغربية لي مافهمتهاش آي يو:
-تقدري تسميني "عويشة لمكوز" على وزن زهري لمعوج
عقدت آي يو حواجبها فاش مافهمتهاش وقالت وهي كاتسد الباب:
-اووه كايبانلي أن المغامرة ديالك ماتمتش على خير
ضارت روعة وقالت وهي كاتحاول تغطي على ألمها :
- بحال داكشي.
ناضت روعة وهزات الكيس لي كان تحت الطاولة ومداتو لآي يو وهي كاتقول بإبتسامة هادئة:
-هاهوما حوايجك وحتى الصاك ولكن القناع لي عطيتيني ماعرفتش فين وضرتو ... كانعتادر منك اختي.
هزت آي يو كتافها بعدم إهتمام وقالت:
-ماشي مشكل عادي اصلا صبقلي لبستو .
إبتسمت روعة بهدوء وهزات حقيبتها علقتها على كتفها ثم قربات من آي يو وعنقتها وهي كاتقول:
-ااه شحال ضريفا نتي ... انشاء الله غادي نشريلك وحداخرا
بادلتها آي يو العناق وهي كاتقول:
-اووه ... لا ماتحتاجيش احبيبتي .
بعدت عليها وقالت وهي كاتحل الباب باش تخرج
-بسلامة عليك . حتى نشوفك غدا إنشاء الله
خرجات روعة وتمشات فالممر وهي كاتفكر الإهانات لي ضربها بيهوم جبل وشعرت بالحقد ناحيتو حتى داك شوية ديال الإعجاب لي كانت كاتشعر بيه مابقاش منو الأثر بعد گاع السم لي وخزها بيه فقلبها . غمضت عينيها وحلاتهوم باش تطرد جبل من بالها وكملت طريقها وهي كاتحاول تتحلى بطاقة إيجابية جديدة.
وصونا تلفونها جبداتو من جيبها وكان مكتوب عليه إسم أسية . جاوبتها روعة وهي كاتقول بحماس متصنع :
-أســــي لباس عليك ...ايوا لباس ملي تفكرتي ان عندك واحد القندوحة سميتها روعة كاتحتاج لي يسول فيها مرا مرا يا نكارت الخير .
شافت أسية فجبل لي كان جالس قبالتها وكايشوف فيها بترقب ثم حمحمت بتوتر وقالت:
- اام راكي عارفا غير لخدمة متلفاني ... فين راكي دابا الهبيلة
ضحكت روعة بسخرية وهي كاتشير بيديها :
-ياربي نتهنى من هاد شلة المجامين لي بلاني بيهوم سيدي ربي ...أما داك نكار لخير ديال عصام وتقول واش كايسول فيا ، بربي وشفتو حتى نخرمزليه ديكور وجهو بضفاري ..
إبتسم جبل بمكر فاش هضرت روعة على عصام بديك الطريقة .. هو طول هاد المدة كان مغرقو فالخدمة باش مايساليش لروعة قبل مايطلاقا معاه هادي واحد الساعة ...
كملت روعة وهي كاتنهد بإستياء:
-أنا عاد ساليت من خدمتي وراني خارجا فين راكي نتي ؟
شافت أسية فجبل لي حرك راسو بمعنى "ماتقوليلهاش راكي معايا" فقالت بتوتر وهي كاتشوف فيه كالس حداها وحاضيها حيت فعلا ديرونجاها :
- أنا فڤيلة كونتيسا جبت شي وراق لسي دون ماركيز من الشركة وعرض عليا باش نتعشى معاهوم وقالي نصوني عليك باش تجي تعشاي معانا اش بانليك ؟
إبتسم جبل بهدوء وهو كايتسنى جوابها لكن روعة بقات ساكتة وهي كاتفكر فاش قالها جبل "مانعاودش نشوف وجهك فڤيلة كونتيسا" ثم قالت بعد صمت :
-واش كاين داك بوبريص تما ؟
عقد جبل حواجبو بإستفهام فقالت أسية بتسائل :
-شكون كاتقصدي ؟
ردت عليها بغيظ :
-وشكون من غيرو البارون لبزاق الحشايشي بوبريص لكحل لصقة ديال درهم ...
كتمت أسية صوت المكالمة باش مايسمعش شكاتقول فيه روعة وماقدرتش تسيطر على راسها وبدات كاتموت بالضحك وهي كاتسمع شنو كاتقول على جبل لي عقد حواجبو بغضب ومارضاش خطف التلفون من يد اسية ودارو على ودنيه ثم وقف وقرب من الباب الزجاجي ديال الشرفة باش يتصنت على راحتو للصواريخ الجوية.
- قالك سميتو جَبل هداك تقدر تسميه الحجر ولكاياص لو كنت أنا لي ولدتو كنت غادي نسميه ...بلاتي نفكر.... ااام سحت لليل ... لا بلاتي موكا لهجالا ...ولا كاع إلى درت معاه بيخير نسميه دجاجة العاكرا .... هاهاها ... تصوري أاسية واحد نهار وصلنا أنا وياه للحبس وعلمني كيفاش نبزق على البوليسي .
برك جبل على اسنانو بغضب وهو كايسمع شكاتقول فيه روعة فضهرو ... كان متوقع أنها غادي تكون محطمة وحزينة وتوقع انها غادي تبكي گاع بعد ديك التمرميدا لي دارلها لكنها خالفت توقعاتو... لا وزايداها كاتعاود لأسية على نهار ديال الحبس لي غير كايتفكرو كايبغي يدفن راسو حي ولا داك الإحراج .
بقا غير ساكت وكايتصنت ليها حتى وصلت روعة قرب مركز الإستقبال وعطات تحية للموضفة لي كانت فالإستقبال وجات خارجة لكن الموضفة عيطاتها وهي كاتقول:
-إيميليا ... تسناي
قربت منها الموضفة ومداتليها بطاقة صغيرة فاللون الأحمر وقالت وهي كاتمايل بحركات وجهها بشوية ديال الغيرة :
-تفضلي هادي بطاقة خلاهاليك واحد الشاب كايحممممق بزين اوصاني نعطيهالك ليديك ونعطيك بوسة من عندي .
توسعو عيون جبل بصدمة وبغا يخرج من التلفون باش يعرف شكون فقربت الموضفة لعند روعة وطبعت قبلة على خدها بقات روعة غير مصدومة فيها ومدت يديها مسحت أثر الكلوس لي خلاتو ملصق فوجهها ...ثم كملت الموضفة وهي كاتقول...
-ياختي ماعرفتش شنو كايعجبهوم فيك .. حتى فاش دخلتي جا واحد الشاب اخر كايسول عليك اوصلتو حتى لغرفتك وعرفتي شنو .. باسني هاهاها
توسعت عيون جبل بصدمة فاش طيحت عليه باطل قد جبل هو راه غير لاحلها بوسة فالهواء هدا مكايعنيش انه باسها !!!...
ضحكت روعة بسخرية وقالت وهي حاطة التلفون على ودنيها :
-واش سمعتيها شنو قالت ااسية .. قالك جبل باسها .. اصلا هاد الأنواع هوما لي يصلاحو لداك لحشايشي لبزاق ... تسناي ااسية علاما نعطي لهاد خيتي جوابها ماتقطعيش غانشربها لعاصير فكاس كبير .
كان جبل غادي يطرطق بالفقصة من تقليلها من شئنو ...إبتسمت روعة بسخرية وقالت:
-المرة الجاية فاش يجي سيول عليا هداك بنادم بالضبط قوليليه إيميليا ماتت نتاحرت فأخر مرة شافت فيها وجهك المنحوس... سمعتيني وبحال دوك الأشكال الشاذة ماتبقايش توريهوم طريقي تفاهمنا الحبيبة .
توسعو عيون جبل وطاحت ليه الرجل مع ليد لو كانت حداه كون وراها الشاذ شنو يقدر يدير فيها
-قولتي شاذ!!!
قالتها الموظفة بدهشة فضحكت روعة وستحلات سيرتو واخا بالسوء وقالت باش تنتاقم لنفسها:
- اه على مافخباركش ... هو راه كايميل غير للرجال يعني الى شاف فيك الحبيبة غادي تكوني غير شبهتي ليه لشي ختو ولا شي صاحبتو والبوسة لي عطاك ماغاتهزش فيه حتى شعرة حراااك تنوضليه لمعلم
هنا جبل مابقاش قادر يصبر وباش مايفضحش راسو دار يديه على فمو باش مايغوتش ويطرطق فوجهها .. تمتم فنفسو وهو كايقول:
-لمعلم هو لي غادي يوريك علاياش قاد فاول فرصة تسمح ليه ... غير بلاتي على جد بوك لكلب .
تنهدت الموضفة وقالت:
- خسارة كان يحسابلي راجل
ردت عليها روعة بسخرية:
-لمرة الجاية بقاي تميزي راه كترو دكورا اما رجال مابقاوش
تمتم جبل وهو كايبرك على سنانو بغضب:
-هانا غادي نوريك واش مازالين رجال ولا لا غير بلاتي عليك الويلة .
جبل كان غادي يطرطق بالغيظ والغضب من الشي لي كايسمعو منها بينما رجعت روعة التلفون لودنها ثم خرجات وقالت لرجال الأمن فاش وصلات للباب
-تصبحو على خير
ثم كملت وهي كاتقول فالتلفون :
-اسية كيف جاك جوابي قصف جو أرض ياك ...هاهاها
قلب جبل عينيه بغضب وندم كاع فاش قال لأسية تعيطليها تتعشى معاهوم حيت مابغاهاش ترجع لدارها خاف عليها زعما ولكن مارضاش يقولهالها هو بنفسو فإستعان بأسية لي كانت جايا باش تناقش معاه امور الشركة , ولكن والله لابقات فيها اذا كان هو شاذ غادي يوريها علاياش قاد هاد الشاذ لي استهانت بيه
-ااه ماقلتليكش عطاتني الموضفة شي بطاقة بلاتي نشوف شنو فيها ...
قربتها روعة لنيفها وإستنشقت رائحة العطر لي فيها وقالت:
-امم فيها ريحة رجولية زوينة ... باينا هذا شي معجب
عقد جبل حواجبو بشك وتجاهل كلمة معجب قدر المستطاع , كان على احر من الجمر باش يعرف شنو مكتوب فالبطاقة ولا شكون لي سيفطهالها ..
فتحتها روعة وهي شادة التلفون بكتفها بينما كاتمشى فساحة الباركينج باش توصل لسيارتها .. فتحتها وقرات شنو مكتوب فيها بصوت هادئ
-ان كان ثوبك أبيض ...فلا تقترب من بائع الزيت.
توسعو عيون جبل بصدمة فاش سمع ديك الجملة وكملت روعة وهي كاتقول بإستفهام:
-هاه....كيفاش يعني!! ... اسية فهمتي شي حاجة ؟
حل جبل فمو باش يهضر ويحذرها باش تهرب من تما فأسرع وقت لكن سبقو صوت صرخت روعة ثم صوت إرتطام التلفون مع الأرض ومن بعد هدوء
-روعة... روعة ... روعة ..جاوبيني ..روعة ... واش كاتسمعيني
غوت بيها جبل بذعر فقربت منو أسية بفضول وهي كاتقول :
-سي جبل مالها روعة ياك لاباس...
لكنه رماليها التلفون وخرج كايجري من ڤيلة كونتيسا وركب فسيارتو وكسيرا بأقسى سرعة وهو كايدعي الله تكون روعة بيخير ...
_________
-عصــــــااااااام ... خلعتيني يعطيك الدل
ضحك عصام بسخرية على روعة لي كانت كاترجف بالخوف وقال وهو كايقلد لغوته ديالها:
-اااااااااي ... ياودي ياودي قالك باغيا تولي بوكسورا وهي كاتخاف من ظلها..!
ضرباتو روعة على كتفو بقوة وقالت :
- عرفتي كون تهرسلي تلفوني بربي حتى تشريه نتا.
شاف فيها عصام بإستخفاف وقال:
- نعطيك تلفوني
- ماغانقبلش بداك التلفون ديال عام نوضو ترگدو واش مازال شي واحد كايخدم نوكيا بيل وفإبيزا.
رد عليها عصام بسخرية وهو كايقلب فعينيه :
-مالها نوكيا ماشي راجل ؟
طلعت وهبطت فيه بعينيها ثم قالت :
-زعما نتا لي راجل !...هادي كتر جوج سيمانات ماسولتي فيا الكافر بالله ... صافي غير بان داك الهضبة ونتا تقلب عليا .
شاف فيها عصام باستنكار وقال:
-شكون هو هاد الهضبة ؟
قلبت عينيها بملل وقالت:
-يعني جبل اعصام البـــاروووون لحشايشــي لبزاق... ركز معايا شويا اعصــــــام ..
ضحك عصام حتى بانت ضرسة العقل ديالو ثم قال :
-تمنيتو يسمعك كاتعيطيليه لحشاشي هاهاها ااااخ شنو يقدر يدير فيك.
قلبت روعة عينيها بإستخفاف وقالت:
-اش غايدير گااااع ؟
رد عليها عصام بسخرية
-غير غادي يجري عليك من الخدمة .
ضحكت روعة بأعلى صوتهت وقالت وهي كاتحل باب سيارتها وركبات :
- قول شي حاجة جديدة
وقف عصام ودار يد على باب السيارة ويد فوق سطحها وطل عليها براسو وقال:
-علاش كاتقولي هكا؟
شافت فيه روعة وقالت ببرود:
-حيتاش طردني من خدمتي هادي واحد الخمسة ديال الساعات .
توسعو عيون عصام بصدمة وقال:
-واش من نيتك كاتهضري ولا كاضحكي
قلبت عينيها بملل وردت عليه:
-واش عمري ضحكت عليك اعصام
عقد عصام حواجبو بإستنكار وقال:
- ولكن ماشي هادشي لي قالي سي جبل فاش شفتو!
شافت فيه روعة باستخفاف وهي كاتحاول ديماري سيارتها لكنها تعكست ومابغاتش ديماري ... حاولت مرة وجوج وثلاثة لكن والو ... فتنهدت روعة بقلت حيلة وضربت عجلة القيادة بيديها ثم شافت فعصام وقالت بصوت بارد:
- اش قاليك؟ .. ديها نفيها فشي جزيرة مهجورة باش عاد يرتاح أنني ماغاديش نقرب ليه من ختو .
شاف فيها عصام بإستهجان وقال:
- لا بالعكس .... اعطاكي ترقية كاع .
علات فيه حاجب واحد وقالت بإستفهام:
-كيفاش يعني؟
إبتسم عصام بساحرية وقال:
-نتي غادي يخصك تفرحي مابقيتيش محتاجة لجوج خدمات ...
قلبت روعة عينيها بملل ورجعت حاولت مع سيارتها باش تخدمها لكن والو مابغاتش فإستسلمت أخيرا وقالت وهي كاتخرج من سيارتها :
- عصام فهمها سيك جبل طردني من الخدمة وقالي مانعاودش نشوف وجهك فڤيلة كونتيسااااا .
ضيق عصام عينيه بإستهجان وقال:
-وعلاش شنو لي وقاع باش يطردك
تنهدت روعة وشعرت بالألم فقلبها فاش تفكرت شنو قالها جبل قبل مايطردها بديك الطريقة المهينة ، ثم قالت وهي كاتصنع إبتسامة باردة فوجه عصام :
-وقاع بيناتنا واحد الخصام بسيط فجرا عليا سيك جبل ... وبلا ماتسولني على السبب حيت ماغانجاوبكش
تنهد عصام بإستياء ثم قال:
- ماعرفتش ..يمكن كاين شي سوء فهم بيناتكوم ...حيت نتي دابا وليتي الحارسة الشخصية ديال سي جبل ..
شافت فيه روعة ورمشت بعينيها عدت مرات باش تقدر تستوعب شي لي قالو عصام .. جبل راه طردها وقالها بصريح العبارة مابغيتش وحدا بحالك ترافق ختي صغيرة ودابا هو باغيها تكون المرافقة والحارسة الشخصية ديالو هو .... كيفاش يعني واش هاد جبل كايعاني من إنفصام فالشخصية سكيزوفرين ؟؟!!
جبد عصام ورقة من جيب معطفو الطويل فاش شافها مصدومة ومدوليها وهو كايقول:
-هاكي تأكدي بنفسك .... عقد عمل لمدة خمسة سنوات بخلصة خيالية لي أنا براسي بقيت غير حال فمي فيها .. روعة نتي الى رفضتي راكي غادي ضيعي على راسك كنز مابحالو كنز .
توسعو عيون روعة بصدمة فاش شافت فالعقد لي كان مكتوب بخط يد جبل لي ماخافيش عليها ولي كايبان أنه كتبو على عوجلة ...تصدمات أكثر فاش شافت المبلغ لي خصصوليها جبل لكل شهر ... بما يعادل 3 مليون مغربية باليورو ... ماقدراتش تسرط ليها وجاتها نوبة ديال السعال وبدات تكح تكح وهي كاتقول بين انفاسها المنقطعة :
- ضربني على ضهري اعصام ... ضربنـــــي اح اح اح
إرتبك عصام وماعرف مايدير فحالتها فعطاها ضربة للضهر كيفما طلبت منو حتى غوتت روعة بأعلى صوتها كانت غير مخنوقة دابا تقصم ليها الضهر
- عصــــااااااااااااااام ....
سد عصام ودنيه بسبب الغوتة ديالها لي صمكتليه ودنيه وقال:
- مالك ...!! انا درت غير لي قلتيه لي!؟
حطت يديها على ضهرها وقالت وهي كاتألم
- قصمتيلي ضهري يعطيك موصيبــــااااااا.... اااااه ضهري
هز عصام أكتافو بعدم إهتمام ثم قال ببساطة:
- اSorry
تكات روعة على سيارتها وهي كاتحاول تجمع داك المبلغ فدماغها لكن مابغاش يتحسب ليها فقالت وهي كاتشوف فعصام بترجي:
-حلف انك مكاتكدبش وان هادا ماشي مقلب من مقالبك السخيفة .
قلب عصام عينيه بغيظ وقال:
-واصافي باراكا أروعة وقت الجد راه جد
ردت عليه روعة بعناد:
-لا حلف وقول يعطيني الموت يعطيني الشلال يعطيني سكتة قلبية ايما كانكدب.
قلب عصام عينيه باستياء وقال وهو كايشوف فيها:
- يعطيك الموت يعطيك الشلل يعطيك...
لكن قبل مايكملها طارت روعة على عصام و عنقاتو بالفرحة هي كانت كاتفكر كيفاش غادي تجمع لفلوس لعلاج ماماها بعدما طردها جبل وكانت هازة الهم لهاد الأمر ...لكن دابا تحل المشكل ...وإن كانت غادي تدعس على كرامتها باش تخدم معاه فهي ماعندهاش مشكل المهم أنها تجمع لفلوس لماماها ....
بقاو رجلين روعة معلقين فالهواء بسبب طولو... فالأول عصام تصدم من ردت فعلها لكن من بعد ضحك وعنقها وزييير عليها بعضلاتو حتى غوتت روعة من شدة الالم
-عصـــاااااااااااام عضــاميييييييي ... طرطقتيلي عضامي
رخف عليها عصام شوية ثم غمض عينيه ودخل راسو بين ثنايا شعرها وعنقها واستنشق رائحة جسمها بإنتشاء... ولأول مرة غادي يشعر بالقلب ديالو كاينبض بسرعة ... لا اصلا هو فينما كايكون معاها كايكون فرحان وهاد جوج سيمانات لي بعد عليها كان بحالي ناقصاه شي حاجة وحياتو مكاملاش بلا بيها ...
واخيرا قدر يعرف ان روعة هي مصدر سعادتو ... ماقدرش يحدد بالضبط هاد الشعور لي كايحسو من جيهتها واش كايحسبو أخوة ولا صداقة ولا إعجاب ولا تغرم بيها لكن ماقدرش يحدد طبيعة مشاعره الجديدة تجاهها .
شعرت روعة بشعور مختلف وهي فحضنه ...عادتا فاش كاطير عليه بهاد الطريقة كايرميها للأرض ويبقا يضحك عليها وهي كاتألم ، لكن هاد المرة مابغاش يطلقها بل شعرت بانفاسو على عنقها بحال اللهيب من شدة سخونته بعدت روعة وشاف فيه باستغراب وقالت :
- اام واقيلة خصك تنزلني للأرض اعصام .
رد عليها عصام بصوت هادئ وهو كايشوف ليها فعينيها ثم شفايفها :
- ماكرهتش نبقا محتافض بيك فحضني طول عمري أروعة .
توترت روعة من شئ لي قالو وإبتلعت ريقها وهي كاتشوف فنظراتو الحارقة ليها ...
-عصام!!
همست بيها روعة بصوت متوتر فإستوعب عصام أخيرا شئ لي قال و حطها على الأرض بسرعة وقال وهو كايحاول يتصنع خفة الدم وهو كامرر يديه بين خصلات شعرو البني الطويل لي كان نازليه على اكتافو :
-ياكما صدقتي راسك اعيشة قنديشا ... ماكرهتش نطرطقليق عضامك بعضلاتي الضخمة المثيرة لي كانطيح بيهوم تيتيز
دخلت عليها الراحة فاش برر عصام فعلتو الغريبة بالضحك ...قلبت عينيها بملل وهي كاتشوف فيه كايستعرض عضلاتو قدامها بكل غرور فضرباتو على صدرو بقبضة يديها وقالت :
- باراكا راك غادي طرطقهوم وهوما مساكن منفوخين غير بالبروتين وشوك .
شاف فيها عصام بغيظ وقال:
-بزاف عليك الكلام الفاحش.
توسعو عيون روعة بصدمة ...قربت منو وقرصاتو من بزولتو لي كان كاينفخ فيها بغرور وقالت بغيظ:
-مليون مرة غادي نقولك ماتبقاش تستعمل مسطلحاتي الكلام الفاحش
حيدليها يديها بسرعة وتحسس بزولتو بالم وهو كايقول بغيظ:
- البشار ... شحال من مرة غادي نقولك ماتبقايش تقرصيني من بزازلي
تفرشخت روعة بالضحك فاش شافت تعابير وجهو ، كان بحال شي عذراء اول مرة غادي تجرب التحرش وهو شاد فصدرو وكايشوف فيها بنظرات طفل يالاه كلا لعصا من عند ماماه ..
تعلات روعة على صبعان رجليها ودوزت يديها مع عنقو وبركات عليه باش يهبط لمستواها ثم قالت بصوت رقيق ديال واحد باغي حاجتو:
- نتا عارفني شحال كيوت وغزيولا وضريفا لدرجة كانمشي على البيض بلا مانهرسو
شاف فيها عصام بنصف عين وهو حاني لعندها وقال:
-ومن بعد ؟!
-بالروجولة غادي توصل ختك للدار حيت سيارتي مابغاتش تخدم .
همهم عصام وهو كايفكر ثم قال :
-هممم....فيا جوع وماتعشيتش حيت قولت نوصل ليك خبر الخدمة الجديدة هي الأولى ....فماعرفتش ...فالحقيقة ...اناااا
قلبت روعة عينيها بغيظ فاش شعرت بيه كايماطل باش يوصل لشئ لي باغي فقالت :
-لعشاء على حسابي ... عندي واحد دجاجة شريتها فلعشية من واحد المطعم طايبا نسخنها ونتعشاو بيها انا وياك اش قلتي...
همهم عصام وهو كايعلي فحواجبو و يلعب بيهوم ثم قال :
-هممم... ماعرفتش .... يمكن إلى كان معاها لفريت وشويا ديال شلاضة والزيتون والمرتدلة والذرة الصفرة و شوية ديال الموناضة وماعرفتش شي خبز تكون سخونى وشوية...
-وشوية ديال لخرا مزوق من فوق منها حتى هو مابغيتيهش
قالتها وتفرشخت بالضحك على المنظر ديالو المصدوم منها فحيد عصام يديها على عنقو بسرعة وغيظ وبعد عليها ومشا وهو كايتمتم بـ:
-قليلة الأدب ...
توسعو عيون روعة بصدمة وشافت فجسمو لي كام كايتمايل بعضلاتو .متوجه لسيارتو فلحقت عليه روعة كاتجري وهي كاضحك ومانتابهتش للبطاقة الحمراء لي طاحت ليها على الأرض
نقزات عليه عنقات عنقو بدراعها وهي كاتقول
- باش تعلم تتشرط عليا .. عند بالك انا فاتحة مطعم الوجبات الخفيفة
نفض عصام يديها من عنقو بإستياء رجولي طفولي لكن مع ذالك رجعت روعة لحقت عليه ولصقت فيه وغير ألغى قفل السيارة ب المفتاح لي فيديه مشات كاتجري وسبقاتو وركبات هي الأولى غير باش تقلي ليه السم .
غادرت سيارة عصام ومرو من أمام سيارة الفيراري ديال أسد لي تنهد بإستياء وتفكر راسو فاش سمع الغوته ديال روعة ... خرج مسدسو بسرعة وتسلل خارج سيارتو وكان مستعد باش يمشي ينقدها منو لكن فاش ضحك عصام بتسلية رجع أسد لسيارتو وهو كايحس بالراحة مخلطة بشوية ديال الإستياء ، حيت فعلا كان باغي يشد ولو واحد من اعضاء أفراد الكاريبي عن طريقها ...
تحلت الباب لي فالمقعد الجانبي ديال أسد وركبت نورسين... شافت فيه بغضب عارم وكانت مستعدة كل الإستعداد باش تنفاجر ليه فوجهو ..
شاف أسد فيها بإستغراب وهمس بصوت هادئ:
-حياتي!!..
-مكاين لا حياتي ولا زمر
قالتها نورسين بغضب حتى أن وجهها كان حمر مزنگ ، شعر أسد بجدية الأمر وقال بسرعة :
-اشنو واقع ؟... واش وقاعليك شي حاجة؟ .. واش تعرضليك شي حد ؟
تنهدت نورسين فاش شافت الهلع على وجه أسد ثم قالت وهي كاتحاول تسيطر على أعصابها:
- علاش قطعتي عليا الخط قبيلة ؟
رد عليها أسد بهدوء:
-حيت شفت شي جوج رجال كايقربو من سيارة إيميليا كلارك هدا علاش قطعت حيت مشيت نتأكد منهوم لكن كتاشفت من بعد أنهم مجرد جوج ديال رجال سكرانين يالاه خارجين من البار كايقلبو على سياراتهوم وتالفين .
قلبت نورسين عينيها بغيض وقالت :
-إيوا اسيدي باش نضيفلك واحد المعلومة لراسك ... البنت ماسميتهاش إيميليا كلارك ... سميتها روعة الخطيب وانا كنت قريبا نموت فدارها فاش دخل عليا شخص غريب جاب الله تخبعت وماشافنيش ونتا اش كادير حاضيلي سكايريا.
-كيفااش
غوت بيها أسد بصوت مندهش ومصدوم فتنهدت نورسين وقالت :
-ديني لدار كانحس براسي عيانا وفطريق نعاودليك شنو وقاعلي ...
ديمارا أسد سيارتو وهو كايحس بالشمتة مع الغضب ولام راسو لأنه تلهى مع جوج رجال سكرانين ونسى مرتو لي هي أهم منهوم كاملين حتى أهم من الشاهدة الوحيدة .
خرجت سيارة أسد ودخلت سيارة جبل ....وأخيرا وصل جبل لهوتيل سود إبيزا وتوجه للباركينج ..... خرج من السيارتو بسرعة فاش شاف سيارة روعة مازالة فمكانها مشا كايجري ليها وطل عليها من الداخل لكن مالقى حتى شي واحد ورجع كايجري ... مسح على راسو بغضب وهو كايتنفس بسرعة. ... وماقادرش يتخيل أن روعة بين يدين الكاريبي لكن لمحت عينيه البطاقة الحمراء مرمية على الأرض فاتوجه بسرعة لعندها وهزها وهو كايتمتم بالحروف المكتوبة عليها:
-إن كان ثوبك أبيض . فلا تقترب من بائع الزيت ...ولاد الكلبة والله لابقات فيكوم
دار البطاقة فجيبو وخرج تيليفونو بسرعة ودار إتصال وهتف بصوت حازم وغاضب:
-دانيال ... بغيتك تجمع كاع الرجال وقلبو إيبيزا سفاها على علاها بغيتكوم تحضرولي روعة الخطيب بأي ثمن... مايطلعش الصبح حتى تلقاها وتجيبهالي مفهوم.
رد عليه دانيال بطريقة ألية:
-مفهوم اسيدي .
قطع جبل الخط ورجع تلفونو لجيبو ثم همس بصوت متحشرج وهو كايشوف فسيارة روعة ...
-غادي نلقاك اروعتي ... ماغاديش نخليهوم يأديوك كانواعدك اعمري ...
توجه لباب لهوتيل وهو شاد فيديه البطاقة الحمراء لي لقاها فالأرض وتوجه لمركز الإستقبال فغير شافتو الموضفة هاد لمرة كحلت بالعما فاش تفكرات اش قالت ليها عليه روعة وتمتمت بين شفايفها بغيظ وهي كاتشوف فيه بنصف عين كايقرب منها :
- اش بغا عاوتاني هاد المخنت ... هادشي لي كان ناقصني غير الشواذ.
__________
نهاية الفصل